NUPELA wok painimaut i kam long International Finance Corporation (IFC) i soim olsem egrikalsa divelopmen long Markham na Ramu Valley bai kamapim planti wok na tu strongim gro bilong ikonomi long PNG.

Long dispela taim we PNG i wok long traim hat long daunim COVID-19 na kirapim bek ikonomi, dispela egrikalsa projek i gat sans bilong strongim ekspot na invesmen, domestik prodaksen na treid na moa wok long kantri. Dispela projek, Markham-Ramu Agricultural Growth Corridor  em i egrikalsa bisnis we i strongim fud sekyuriti. Em i lukluk long senisim rot bilong egrikalsa na divelopim bai kamap wanpela rot bilong mekim bisnis. Wantaim dispela projek, bai gat divelopmen  na invesmen plen bilong  wok bilong egrikalsa long PNG. Long lukim dispela i kamap, bai i mas gat gutpela infrastraksa na gutpela maket link i we bai stap moa long 20 yia. Dispela projek em bai stap longpela taim na bai kisim sapot bilong gavman na ol praivet sekta. IFC i painimaut olsem i gat planti gutpela sans bilong mekim namba wan maket long dispela projek. Kain olsem mit bilong enimal, prodaksen bilong frut na kumu, prodaksen bilong kakau na ol narapela moa. Dispela projek bai stap long hap we i gat ekses long bikpela haiwe rot bai kamapim planti gutpela sans. “Pasin bilong mekim wok painimaut na luksave long ol rot bilong strongim ikonomi na yusim olsem evidens i ken sapotim divelopmen bilong ikonomi long kantri,” Hai Komisina bilong Australia long PNG, Jon Philp i tok.

Em i tok dispela stadi bai bringim planti sans bilong invesmen long kantri na Australia i redi long sapotim PNG long opim egrikalsa potensal  yusim ol patna olsem IFC. “Nu Silan i save sapotim gut egrikalsa eneji sekta long PNG bilong helpim kantri long winim ol ikonomik driman bilong en. Long promotim dispela projek, Nu Silan i wok bung wantaim Australia long sapotim wok bilong IFC long PNG,” Dokta Nathan Ross, Deputi Hai Komisina bilong Nu Silan i tok. IFC Residen Representetiv bilong PNG, Markus Scheuermaier i tok dispela projek bai helpim gut tru ol pipel bilong PNG bikos 80 pesen bilong ol pipel long PNG em ol fama. Ol i mas gat gutpela rot long ol maket na kisim mani long ol prodak bilong ol.