LAS Wik ol pipel long Bogenvil i bin mekim protes i go long PNG Power opis long autim bel hevi bilong ol long sevis bilong PNG Power long rijon.

Sevis bilong PNG Power long Bogenvil, moa yet long Buka taun na Arawa i no wok long kamap gut na dispela i bringim bikpela hevi long ol bisnis long dispela tupela senta. Bikos long dispela astingting na ol pipel i bin protes long Buka taun long autim bel hevi bilong ol. Long adresim dispela hevi, Menesa bilong Buka Brens PNG Power, Stella Rihata i bin tokim ol pipel olsem, PNG Power em kampani bilong stet na i no praivet kampani. Em i tok PNG Power i sainim MoU pinis wantaim Atonomus Bogenvil Gavman long givim pawa i go long ABG.

Em i amamas long harim ol wari bilong ol pipel na ol bisnis komyuniti na em bai presenim i go long ol bikpela bos long het opis long Mosbi. Astingting bilong wanem na sevis bilong PNG Power i no gutpela long Buka em bikos kampani i gat dinau long saplaia bilong fuel GMT AUTOMATION. Bosman bilong GMT Automation, Nick Peniai i tok PNG Power i gat dinau long mani mak long K6 milien. Olsem na saplaia i no saplaim fuel bilong ranim pawa olgeta de. Mista Peniai i tok kampani bilong em i wok long gat konsaltesin wantaim ABG long kisim fuel i kam long Singapore bai em i ken saplaim fuel long ol bisnis long Bogenvil  wantaim PNG Power long daun prais.