MINISTA bilong Egrikalsa na Laipstok, John Simon, Vais Minista bilong em Pogia Ghate na Siaman bilong Coffee Industry Corporation  Limited (CICL) Jerry Kapka i bin holim namba wan miting bilong nupela bod long dispela wik.

Long miting, Siaman Kapka i toktok strong long bod long luksave long impotens bilong kopi indastri long kantri. Em i tok olsem, driman bilong em em long apim kopi indastri long K500 milien indastri i go long bilien indastri. Wantaim dispela toktok, Vais Minista Ghate i wanbel wantaim Mista Kapka. Em i tok kopi em wanpela impoten komoditi bilong kantri we bai benefitim ol fama. Em i tok gavman i putim insentiv i go long prais sabsidi bilong kopi na em i salensim bod long painim rot bilong kisim kopi i go long narapela level. Em i tok prodaksen bilong kopi i pundaun na nau em stap long bod long mekim sampela senis long kirapim bek indastri bilong kopi. Minista Simon i toktok strong long hevi bilong nogat wok long kantri na hau kopi i ken helpim ol yut long lusim strit na wok long kopi indastri bilong painim liklik mani bilong sapotim ol. Em i salensim bod long stat lukluk long painim “Eksklusiv

maket” long painim ol baia we i ken baim kopi long gutpela prais. Em i tok bikpela salens bilong bod em long painim gutpela prais bilong kopi. CIC bod i gat 12-pela nupela memba, 9-pela non-eks opisio na 3-pela eks opisio memba.