OL Tewai Siasi Distrik Divelopmen Atoroti (TSDDA) bai namba wan DDA long kantri long kisim telekomyunikesen tawa long Morobe provins.

Memba na Vais Minista bilong Nesenel Plening na Monitoring Dokta Kobby Bomareo i tok prairoti bilong em long karim aut rurel telekomyunikesen long ilektoret na promotim ikonomik sasteinabol human risos divelopmen na ol arapela asosiet sevis. Bomareo i bin givim sek K3.5 milien long Kumul Telikom Holdings Limited (KTHL) long karim aut wok bilong instalesen na teknikol koneksen bilong Telikom, B-Mobail, EMTV na FM100 long olgeta hap bilong Tewai Siasi distrik. Dokta Bomareo tok TSDDA bai patna wantaim KTHL na arapela ol interes telekomyunikesen kampani long wok putim aut fospela telekomyunikesen tawa long komesal ples bai givim sevis long ol pipel bilong Tewai Siasi long ol yia bai kam. Ol putim tupela telekomyunikesen tawa go antap pinis wantaim wanpela long Ipang viles long Wasu LLG na narapela long Sialum distrik hetkwata long Sialum LLG we bai lukim KTHL salim ol teknikol enjinia bilong em long wokim teknikol koneksen long ol ilektoret long kisim gutpela mobail, stret lain, intanet, televisen na redio sevis. Narapela tupela telekomyunikesen tawa bai ol bildim long ples bilong ol Siasi LLG long givim ikwal sevis long ilektoret bikos Tewai Siasi i gat 3-pela LLG. Em i tok tu olsem ilektoret bilong em stap klostu wantaim Bismark Sea na ol i save hatwok long kisim ol besik gavamn sevis long Sialum gavman taun we ilektoret hetkwata i stap, olsem na dispela i save pasim telekomyunikesen projek long bung wantaim ol arapela hap bilong wol. Em i tok olsem ol rurel telekomyunikesen i mas stap insait long CONNECT PNG polisi bilong nesenel gavman bikos i no rot tasol ken bungim PNG wantaim em nidim telekomyunikesen netwok tu long kisim gutpela infomesen na strongim ol pipel. Em i tok ol gavman skul, haus sik na narapela gavman teknikol sevis olsem DPI, Fisheris na Foresti wantaim polis na difens na ol narapela long tupela pablik na praibet sekta bai kisim gutpela sevis na apim namba bilong ikonomik sevis insait long distrik na provins wantaim.

Jacklyn Kimala i raitim