PRESIDEN bilong Atonomus Rijon bilong Bogenvil, Ishmael Toroama, i tokaut pinis olsem long namba 1 de bilong Septemba 2025, bai Bogenvil i kisim independens long Papua Niugini.

Presiden Ishmael Toroama i bin tokaut long dispela de long join konsaltetiv miting namel long ABG na PNG gavman long Kokopo long mun Me. ABG palamen i bin toktok gen long dispela long kibung bilong en long tupela wik i  go pinis.

Ol ripot i tok Mista Toroama i bin tokim Praim Minista James Marapela long dispela de long toktok long dispela de long taim tupela gavman i bin sainim ol agrimen bilong wokbung long kamapim independens.

Wanpela konstitusenel loya na risets felo long Australian National University, Dr Anthony Regan i tok i gat planti wok tru i stap long ol i mas wokim pastaim long Bogenvil bai ken kisim independens.

Tasol em i tok klostu 98 pesen bilong ol vota long 2019 referendum i laik long Bogenvil i mas kisim independens na ol lida bilong Bogenvil i sapotim dispela tingting.

Llane Munau wanpela yangpela lida bilong Bogenvil i tok i gutpela olsem Presiden Toroama i tokaut pinis long taim ABG i laik Bogenvil i kamap kisim independens.

Ms Munau i tok bai mekim gavman na pipel bilong Bogenvil wantaim nesenel gavman na ol divelopmen patna, i klia na mekim ol wok bilong bungim dispela de bilong independens.