BIKPELA hevi i kamap nau long politiks bilong Samoa. Nupela pati husat i laik kamapim nupela
gavman bihain long 40 yia i no inap go insait long palamen bikos ol lain bilong olpela praim minista i
lokim dua bilong palamen haus long Mande moning.

Dispela bung bilong palamen long Mande em i bilong putim FAST paty long gavman na lida
bilong ol Fiame Naomi Mata'afa olsem namba wan meri praim minista bilong Samoa.
 Suprim Kot bilong kantri i bin rausim askim bilong olpela praim minista na lain bilong em
long stopim bung bilong palamen long Mande.
 OIpela Praim Minista Tuilaepa i bin holim pawa inap long 22 yia nau, na em i strong yet
olsem em i gat inap memba long kamapim gavman.
Long taim ol lain bilong FAST i kamap long palamen long putim lida bilong ol, Fiame Naomi Mata'afa
olsem nupela praim minister, ol i lukim ol polis i samba i stap na dua bilong palamen haus i lok. Ol
lain bilong olpela praim minista i bin lokim dua na i stap insait.
Suprim Kot i bin tok nogat long oda bilong Gavana Jeneral bilong kantri long stopim palamen long
bung na makim nupela gavman. Gavana Jeneral i no bin tokaut watpo na em i laik stopim palamen
long bung.
Olpela Praim Minista Tuilaepa Sailele Malielegaoi i no laik harim tok bilong Suprim Kot. Em i tok
Gavana Jeneral bilong kantri tasol i gat rait long givim tokorait long palamen i ken bung.

Tuilaepa i strong tu olsem pati bilong em, Human Rights Protection Party (HRPP) i gat inap memba
long holim gavman yet, tasol planti lain i tok em i no bihainim demokretik wei bilong luksave long
nupela gavman.
"Em i asua long traim holim pawa yet...na yusim egensim konstitusen,” wanpela jenelis, Lagipoiva
Cherelle Jackson i tok.
"Dispela e mi wanpela sori de tru bilong demokresi long kantri bilong mipela we mipela i no bihainim
lo na strongim demokresi.”
Foren Minista bilong Australia, Marise Payne i tok long Twitter olsem Australia “i bilip” long kot
bilong Samoa.
"Australia i holim strong guptpela pren bilong en wantaim Samoa. Em i impoten olsem olgeta lain i
mas soim rispek long lo na bihainim demokretik pasin,” Payne i tok.
"Mipela i bilip long ol institusen bilong Samoa wantaim kot sistem bilong en.”
Praim Minista Jacinda Ardern bilong Nu Silan i tok, ol bai sapotim ol institusen bilong Samoa na
demokresi bilong kantri."
"Mipela i bilip long demokresi bilong Samoa na ol han bilong gavman," Ms Ardern i tok.

Nesenel ileksen bilong Samoa i bin kamap long April 9 we FAST wantaim HRPP pati i bin lok we
tupelo wantaim i bin winim 25 sit na wanpela indepnden kendidet i winim wanpela sit. I gat 51 sit
long palamen bilong Samoa.
Dispela independen i joinim ol memba bilong FAST pati. Orait Praim Minista Tuilaepa i apim namba
bilong pati bilong em long taim em i yusim seksen bilong lo long makim ol meri long palamen.
Bihain long dispela em i laik kantri i mas wokim namba tu ileksen gen long Me 21.
Ol kot i tok nogat long dispela tupela samting na long las wik Fraide, wanpela panel bilong ol jas i
rausim askim bilong HRPP pati, long stopim oda bilong kot.
Tuilaepa i strong yet olsem HRPP i gat namba long kamapim gavman bilong ol 220,000 pipel bilong
Samoa.
Bipo long Fiame i bungim ol memba bilong tupela pati wantaim, em i tok strong olsem ol i mas harim
tok bilong kot.