Taim ol lain long Markham na Kabwum i kukim ol balot bokis nas pepa long hap bilong ol, ol i putim mak nogut long nem bilong ol ong bagarapim Nesenel ileksen bilong kantri.

MOROBE provins i gat nem na rekot nau long bagarapim Nesenel ileksen bilong kantri we i save kamap long olgeta 5-pela krismas.

Makam distrik na Kabwum distrik i no lukluk na skelim gut o lukbek pastaim. Nogat, ol I minim stret na bagarapim na kukim olgeta ballot pepa na bagarapim ron bilong kaunim vot insait long distrik bilong ol long dispela mun.

Dispela i no pasin bilong Morobe tasol namba wan taim tru kain samting olsem I kamap olsem na yumi laik save wanem as tru na ol I mekim kain bikhet pasin olsem.

Kabwum em ol Kristen manmeri pulap long dispela hap we gutnius bilong Jisas Krais long laikim narapela, harim tok, givim bel na soim gutpela pasin, lotuim God em ol pipel bilong Kabwum I pulap tru long dispela. Las taim tasol Kabwum I lukautim bikpela Sinod bilong Luteren sios long wanem Morobe na Papua Niugini I luksave olsem Kabwum em naispela kristen distrik.

Oloman, satan I kam we stret na kukim bel bilong ol Kabwum na Makam long bagarapim dispela bikpela ileksen bilong pipel? Eksen bilong satan I daunim stret ol gutpela Kristen lain bilong Makam na Kabwum.

Sapos Ilektoral Komisin I tokaut olsem Kabwum na Makam em feil ileksen, sore stret bai tupela distrik ya bai no gat memba inap sampela taim bihain. Bai no gat lida long haus palamen na planti bikpela sevis na divelopmen bilong Kabwum na Makam bai stop inap ol I gat memba. Dispela em long wanem olgeta sevis na helpim bilong gavman i save kam bihainim baset na go long distrik bihainim lidasip na go daun long distrik na ol pipel.

Olgeta hap i save gat belhat na kros long pasin bilong vot na wei bilong ranim ileksen. Insait tu long kauntim rum ol skrutinia na opisal tu I save lukim sampela samting i no stret na ol I save komplen. Olsem na sapos ol lain i no bin amamas, ol inap long karim ol komplen na hevi bilong ol go long Ritening Ofisa (RO) na ol ileksen opisel na rejistaim olsem petisen. Orait dispela petisen em ilektoral Komisina tasol bai bekim.

Narapela tu em sapos yu gat gutpela na klia evidens long ol asua na krangki pasin I kamap long taim bilong vot o kaunim taim, orait rekotim gut, kisim nem na dei bilong ol dispela hevi o rong pasin na givim long kendidet bilong yu long kisim I go long Kot bilong Disput ov Ritens. Em dispela rot tasol. I no bilong holim paia na sotgan na bus naip, na katim na kukim ol samting nabaut.

Sori stret, Kabwum naMakam, yumi weit na lukim disisen bilong ilektoral Komisin long mekim feil ileksen long tupela distrik ya o no gat.

Dispela tu bai kamapim bikpela hevi stret long risal bilong rijinol sit long kamapim Gavana bilong Morobe provins. Ol rijonal kendidet bai lusim namba na sans bilong ol long win long wanem namba bilong ol long Kabwum na Makam i bagarap nau.