PNG i sot tru nau long ol nes long lukautim ol sikmanmeri na mekim wok bilong givim COVID-19 veksin long ol pipel. Delta variant bilong COVID-19 i kamapim bikpela hevi olsem na ol haus sik na helt senta i nidim moa nes na ol komyuniti heltwoka (CHW).

Long dispela wik Dipatmen bilong Helt i putim wanpela pablik toksave long kisim ol nes na komyuniti heltwoka husat i greduet na i no painim wok yet o ol lain husat i ritaia long wok na krismas bilong ol i no abrusim 63 yia. Ol ovasis gavman i luksave long bikpela presa ol haus sik long PNG i pilim olsem na las wik na dispela wik, Australia na Britain i bin salim sampela dokta na nes i kam long givim han long ol heltwoka bilong yumi. Long taim sik COVID-19 i bin kamap klostu long pinis bilong 2019, olgeta kantri long wol i bin pilim bikpela hevi tru. Planti tausen manmeri na ol helt woka bilong ol tu i wok long kisim dispela sik olgeta de na planti bilong ol i dai. Las wik Wol Helt Ogenaisesen (WHO) i bin tok COVID-19 i kilim moa long 800,000 ol nes, dokta na arapela heltwoka long wol na moabeta ol kantri i mas hariap long senisim ol. PNG i bin lukim dispela hevi i kamap long ol arapela kantri, tasol i no bilip olsem COVID-19 bai kam kamap long kantri bilong yumi, na bagarapim helt sistem na ol wokmanmeri. Ol dokta i bin givim stia toktok long ol pipel i mas kisim banis sut o veksin bilong COVID-19. Ol i tokim ol papamama long wet wanpela o tupela yia pastaim na karim nupela pikinini bikos COVID-19 i ken kilim planti belmama. Tude Pot Mosbi Jeneral Hospital (POMGEN) i lukim planti belmama i gat COVID-19 na sampela i dai long taim bilong karim bebi. PNG i stat long pilim pen na presa bilong COVID-19. Las wik Praim Minista i bin hatim ol Provinsal Helt Atoriti bikos planti bilong ol i no salim plen bilong ol wok redi bilong ol. No gat plen bai no gat baset na mani bilong strongim ol wok redi long ol haus sik na helt senta na bai moa pipel i kisim COVID-19 na dai. Long Nesenel Kepital Distrik we COVID-19 i wok long kilim moa manmeri, ol pipel i isi isi yet long go kisim veksin. Olgeta de moa manmeri i wok long dai. I no gat spes moa long mog long putim ol bodi. Long dispela wik POMGEN wantaim NCDC i toksave olsem bai ol i planim 232 bodi bilong ol manmeri na 16 bodi bilong ol pikinini husat i bin dai namel long mun Me na 15 Oktoba 2021. Gavana bilong NCD i no laik putim siti long lokdaun. Em i tok ol i bin traim dispela rot pinis tasol i no wok. Em i tok ol pipel bai no gat rot bilong painim mani na i no gat inap polis long putim was long olgeta kona bilong siti. Gavana i tok wanpela rot tasol bilong daunim dispela sik em long kisim banis sut. Em i tok bai i gat moa ples insait long siti we ol pablik i ken go kisim COVID-19 veksin. PNG i stap long mak bilong bikpela hevi tru. Long taim ol pipel i no harim tok na kisim veksin na bihainim nupela pasin bilong stap seif, bai ol i kisim COVID-19. Tasol long taim ol i ran i go long haus sik bai i no gat inap nes na dokta long helpim ol. Yumi sot tru long ol dokta na nes. Yumi hop baset bilong 2022 bai i gat moa mani bilong strongim ol nesing skul long kisim moa studen husat bai wok long ol haus sik na helt senta long wan wan provins. I gutpela long lukim kain mani olsem K40milien i go long mekim wok bilong sevim laip bilong 8 milien pipel bilong PNG na maski long westim long stretim ol bagarap long Palamen na nupela kar pak bilong ol 111 MP.