Dia edita,

Mi amamas long lukim ol benk olsem BSP na ol arapela fainensal institusen i wok long givim skul long ol SME long yusim nupela teknoloji long bisnis bilong ol.

Dispela em i gutpela wei bilong helpim ol SME long strongim na groim bisnis bilong ol. Tude ol bisnis i traim long yusim benk trensfe long salim na baim ol samting. Ol i gat ol smartphone inap helpim ol long wokiim ol benk trenseksen wantaim ol kastoma na i no ken wari long karim mani raun.

Mi hop dispela sevis i stat long ol siti bai i surik i go tu long ol provins we olgeta manmmeri i ken yusim dispela isi sistem long ranim bisnis bilong ol.

Yumi stap long 21 century nau na i mas gat senis i kamap long wei bilong ranim ol liklik bisnis bilong yumi. Givim save long ol liklik bisnis na bai ol i strongim ikonomi bilong PNG.

Brian Danly

Gordons

NCD