PAPUA NIUGINI i gat hamas manmeri na pikinini? Tude yumi tok populesen bilong kantri i kalapim pinis 8 milien pipel na i wok long suruk i go antap yet.

I no gat klia rekot bilong soim hamas manmeri tru i stap long kantri. Bai yumi save long trupela namba bilong populesen long taim Nesenel Stetistiks Opis (NSO) i mekim 2021 Nesenel Populesen na Hausing Sensus.

Tasol sori tru, i luk olsem wok bilong nesenel sensus bai i leit tru nau. Taim gavman i bin makim long dispela wok bilong kaunim ol pipel, em 12 – 23 Julai 2021. Bikpela hevi bilong COVID-19 i bin stopim ol wok redi na gavman i surukim taim i go long namel bilong dispela yia. Yumi stap nau long mun Jun na i gat tripela wik tasol i stap bipo long wok bilong 2021 nesenel sensus i stat. Bai sensus i kamap tru long mun Julai o bipo long pinis bilong dispela yia o nogat?

I gat ol toktok i kamap olsem nesenel sensus bai i no inap kamap long dispela yia, 2021. I no gat moa pablik toksave i kam long opis bilong gavman i lukautim dispela wok bilong kaunim ol pipel. Las bikpela pablik awenes bilong ol i bin kamap long pinis bilong las yia we ol i bin mekim ol wok redi bilong kaunim ol haus long taun na hamas manmeri i slip long haus long nait. Dispela em ol test tasol bilong redi gut long wok tru i kamap bihain.

Olgeta gavman dipatmen na ol kampani na ol arapela bisnis long kantri i pilim bikpela pen ol salens bilong COVID-19. Ikonomi bilong kantri i no lukim gutpela bekim long ol samting PNG i save salim i go aut na kisim mani. Mani i sot na planti wok i no kamap bikos long dispela hevi.

NSO wantaim ol arapela gavman dipatmen i pilim pen bilong dispela hevi tu. Ol i nidim mani na ol arapela samting bilong redi long statim nesenel populesen sensus long mun Julai, tasol i luk olsem i gat hevi i stap. Bai nesenel populesen sensus i go het yet long 2021 o bai nesenel gavman i surukim i go bek long 2022?

Kantri i mas save long populesen bilong en. Dispela impoten infomesen bai helpim long mekim ol plen bilong divelopmen i kamap long wan wan provins na kantri. Ol skul i mas save hamas spes ol bai nidim long ol pikinini long neks 10-pela yia. Ol haus sik i mas save ol bai nidim hamas wod na bet bilong ol siklain. Ol ilektoret i mas save hamas manmeri i stap long wan wan kaunsil wod.

Statistiks bilong populesen em i bikpela samting. Olgeta kantri long wol i save wokim populesen sensus bilong ol bihain long 10 o 20 yia samting. Na yumi tu long PNG i mas mekim bikos yumi nidim dispela infomesen long mekim ol plen bilong kantri.

Sapos i gat ol hevi i stopim NSO long gohet na wokim 2021 Nesenel Populesen na Hausing Sensus long mun Julai, orait yumi hop nesenel gavman i ken helpim ol long stretim na makim nupela taim gen bilong mekim dispela bikpela wok bilong kantri.

Wok bilong kaunim ol manmemri long olgeta kona bilong PNG em i bikpela hatwok tru. Wok bilong givim trening long ol lain bilong kisim sensus em i bikpela wok tu. Na wok bilong toksave long ol pipel bilong PNG long wanem taim sensus bai kamap em i impoten wok tu. Ol pipel i mas save na stap long haus bilong ol we ol opisa bilong NSO i ken kaunim ol.

Ol wok bai i ran gut, sapos NSO i gat ol stretpela lida bilong stiaim wok, lukautum gut mani bilong dispela wok, na toksave stret long wanem taim nesenel sensus bai kamap. Tasol nau yet olgeta lain i stap long tudak. Ol i no klia sapos nesenel populesen sensus bai kamap long dispela yia o nogat. Gavman i mas tokaut na tok stret.