Dia edita, Long taim mi bin go long opis bilong Air Niugini long Wewak, mi bin kirap nogut tru long painim dispela opis i hait insait long lapun haus kapa arere long rot i go long Yacht Klap.

I no gat wanpela klia sain ausait long dispela “opis” long soim olsem em i opis bilong nambawan airline bilong PNG.

Mi sanap ausait long san wantaim ol arapela kastoma na wetim sigi husat i rileks gut tru long sia long singautim wan wan manmeri i go insait. Mipela i mas bihainim protokol bilong Nupela Pasin.

Insait bilong opis i gat ol gutpela sia bilong sindaun na i luk nais.

Olgeta de Air Niugini i save kisim bikpela mani tru long ol pasindia wantaim kago bilong Is Sepik. Watpo na ol i no inap spendim sampela bilong dispela mani long rentim spes long wanpela gutpela hap? I luk olsem Hugo Berghuser i amamas long kisim rent mani bilong PX long olgeta mun na i no wari long ol kastoma husat i save sanap ausait long san na ren.

 Ol marketing lain bilong Air Niugini i mas sem long promotim dispela airline kampani olsem na ol i no bisi long putim sain we ol kastoma i ken lukim na save long ples bilong baim tiket long Wewak.

Boram ples balus i luk nais tru nau. Orait PX tu i mas promotim opis bilong en long taun tu na apim nem bilong PX long Is Sepik.

Shirley Daika

Ensisi Veli

NCD