NEKS wik Mande skul bai i stat gen na planti pipel bai i muv raun i go i kam.

Nesenel Pandemik Kontrola na Polis Komisina David Manning i tok ol bai i mas bihain stret ol mesa bilong COVID-19 na nupela pasin.

Kontrola Manning i oraitim ol skul long stat gen long taim namba bilong COVID-19 i wok long go antap na ol indai tu I wok long kamap planti.

Long mun Mas las yia taim PNG i bin ripotim namba wan keis long kantri em i bin pasim olgeta dua na putim lokdaun na stet ov imejensi. Dispela i bin kamapim planti hevi long ol famili long ol taun na siti.

Dispela mesa i bin kamap tu long taim PNG i kalap nogut na i nogat planti infomesen long dispela sik. Planti pret i bin stap long dispela taim na ol skul i bin pas tupela taim.

Nau moa long 12 mun bihain namba bilong COVID-19 keis i go antap moa yet na ol dua i no pas, na i no gat lokdaun yet tasol Kontrola Manning i tok strong long ol pipel i mas bihainim nupela nomol pasin; em long werim pes mask olgeta taim, wasim han olgeta taim, stap longwe long narapela na stap long haus sapos ol i pilim sik.

Tasol planti pipel i no bilip COVID-19 em i sik tru na em i kilim ol pipel pinis. Long ol arapela kantri olsem India, Brazil, USA na Mexico namba bilong indai long dispela sik i stap long milien pinis. I tru PNG i lukim liklik namba bilong indai tasol dispela i no min yumi no ken kisim was.

Yumi mas stat tingting olsem wanem na ol pipel i dai klostu klostu?

COVID-19 i no pilai samting moa. Em i stap pinis long PNG na em i kamap ples klia pinis.

Gavman i gat wok long lukautim ol pipel bilong en na em i givim ol mesa. Sapos moa pipel i bihainim ol mesa ating PNG bai i winim dispela sik COVID-19. Tasol planti i ting ol mesa i tait tumas na i bagarapim laip bilong ol.

Em i moa gut ol pipel i sanap wantaim gavman long dispela taim long daunim COVID-19. Yumi helpim ol helt wokmanmeri bilong yumi na ol polis na sekyuriti na daunim dispela sik. Ol papamama i gat wok long helpim ol pikinini long stat bihainim nupela nomol pasin bilong werim pes mask olgeta taim, taim ol i stap long bung ples na ples i pas pas.

COVID-19 em i wanpela bikpela singaut tru bilong ol pipel long senisim pasin. Pasin bilong yumi long lus tingting na raun, i no tingim ol arapela na spet nabaut.

Sapos yumi tingim pes mask i stap namba wan mesa nau long stopim spet bilong yu i kalap i go long narapela. Man, meri na pikinini i gat sik i ken karim binatang insait long spet bilong ol na binatang i save kalap taim ol i kus. Olsem na taim yu werim pes mask stret, karamapim gut nus na maus, yu tokim narapela olsem yu tingim em.

Ol pikinini bai i go skul stat long Mande na maski i no gat ripot bilong ol liklik pikinini wantaim sik COVID-19 nogat papamama bai i laik lukim pikinini bilong em i kisim dispela sik. Olsem na kisim was na banisim famili bilong yu.