LONG Mande dispela wik Santu Charles Lwanga Katolik sios long Gerehu i holim tupela Misa bilong indai; wanpela long moning na wanpela long apinun.

Long dispela de yet Santu Peter Channel Katolik sios long Erima i holim tu wanpela Misa bilong wanpela indai long peris bilong ol.

Long Facebook olgeta de i gat toksave bilong wanpela indai i kamap.

Long wankain taim toksave bilong Nesenel Kontrol Senta bilong COVID-19 tu i wok long kam aut na olgeta de nau inap tupela wik olgeta ol i toksave long wanpela indai i kamap.

Sampela politisen na sampela arapela husat i kisim sik COVID-19 i tok pinis olsem dispela sik em i no giaman na em i no pilai samting. Em i tru na em inap kilim pipel.

Bihain long ol ripot bilong ol indai long COVID-19 Nesenel Kontrola David Manning i ripotim indai bilong memba bilong Kerema Open Richard Mendani long las wiken.

Planti i pret long sik ya tasol ol i no bihainim ol nupela pasin bilong abrusim sik COVID-19. Ol i no werim mask long pes, o stap longwe long narapela. Ol lain i pilim sik i no stap long haus, ol i raun nabaut i stap.

Ol ripot bilong COVID-19 i tok sik ya i kalap bikos long komyuniti trensmisen. Komyuniti trensmisen em i olsem, ol helt woka i no inap luksave long sik ya i kam olsem wanem na husat ol lain i gat dispela sik na i stap long komyuniti.

Hevi bilong Pot Mosbi Jenerel Haus Sik em i gutpela piksa bilong komyuniti trensmisen. Ol helt woka i no save olsem ol i gat dispela sik na taim ol i serim kaikai o bung wantaim long kopi rum binatang bilong COVID-19 i kalap i go long wanpela na narapela. Nau ol i ripotim 122 wokmanmeri long dispela haus sik i gat dispela sik.

Wankain long Talasea long Wes Nu Briten Provins. Maski Provinsel helt atoriti long Kimbe I tokaut long namba i go antap hariap tru ol pipel i no harim na stap longwe o werim mask. Ol i go het tasol long laip bilong ol.

Long las yia taim COVID-19 i kam nupela taim planti infomesen I bin kam wantaim. Wanpela dispela infomesen em olsem binatang bilong COVID-19 I save sindaun antap long ol tebol o sia o ol samting olsem longpela taim na tai mol pipel I holim sia o tebol ol I ken kisim dispela binatang na hariap true m bai I go insait long bodi bilong ol.

Tasol bikpela samting em sapos ol helt woka na ol franlain wokmanmeri i kisim COVID-19 husat bai I stap long lukautim ol pipel taim ol i sik na kamap long haus sik o helt senta?

Planti tok pilai na tok fani long COVID-19 i stap pinis long ol komyuniti. Sampela i tok dispela sik em i no bilong PNG tasol ol pipel i dai pinis long dispela sik long PNG. I tru planti dispela indai i kamap bikos ol dispela pipel i gat ol arapela sik pinis. Tasol ol pipel i mas tingim olsem maski ol i gat narapela sik pinis, COVID-19 bai i mekim hat long ol i kisim gut marasin bilong ol o long pulim win o kain ol samting olsem na ol bai i lusim laip bilong ol.

Gavman i putim sampela strongpela mesa pinis bilong menesim dispela sik nogut. Sampela dispela mesa i min olsem ol pipel i mas lusim mani long  stap long kwarentin o long haus sik. Sampela dispela mesa bai i mekim laip i hat long ol pipel tasol sapos ol pipel i harim tok na bihainim kantri i ken winim dispela sik nogut.

Em i gutpela sapos ol pipel i putim yau gut long ol toksave i wok long kamap na bihainim nupela pasin bilong was long ol yet. Em i moa gut long stap longwe long narapela na abrusim COVID-19. Na sapos ol i mas go long maket o benk ol i mas werim mask na stap longwe tru long ol lain i kus.

Em i moa gut long stop laip na inapim wokabaut bilong dispela laip. Nogut ol haus lotu i bisi long mekim Misa bilong ol indai o ol haus sik i sot long wokmanmeri na ol sikmanmeri i no inap kisim gut helpim.