Dia Edita,

Mi sori tru lida bilong yumi Gren Sif Sir Michael Thomas Somare i dai na lusim yumi go. Mi sindaun wantaim olgeta pipel bilong Papua Niugini na krai wantaim ol long dispela taim bilong sori.

Long dispela taim tu mi amamas long lainim planti stori bilong em, na stori bilong hau Papua Niugini i kamap independen kantri. Tenkyu tru.

Mi amamas tu long harim ol stori bilong bipo lidaman Sir Pita Lus na driman bilong em tu. Na tu stori bilong Dokta John Momis long mama lo bilong kantri.

Tasol mi sori dispela ol stori i kamap nau tasol na mi wari olsem mi no bin lainim dispela ol samting long skul. Ating Papua Niugini bai i stap long narapela mak nau sapos olgeta yangpela i lainim histori bilong kantri bilong ol.

Nau mi laik save long olgeta lida husat i bin wok wantaim Gren Sif Sir Michael Somare. Inap yupela i serim stori bilong ol tu? Mi harim ol i kolim planti nem long ol program long televisen tasol i moa gut sapos yupela i raitim long niuspepa na mipela i ken ritim na lainim wanem driman bilong ol long taim bilong ol wait man.

Roselyn Pero

Morata, Pot Mosbi