EM i gutpela tru Edukesen Seketeri Uke Kombra i stikim ol tisa na ol skul prinsipal na ol tisa koles.

Planti yia nau ol pipel i singaut long kwaliti edukesen na em i gutpela tru long lukim wanpela seketeri i
mekim samting stret.
Kwaliti edukesen i no inap kamap sapos tisa i no gat inap save na ekspiriens long givim ol sumatin. Na tu
sapos em i no givim taim bilong em long helpim ol sumatin.
Long ol elementeri skul planti i tok em ol liklik pikinini tasol na ol i no nidim lain i gat planti save. Dispela
tingting em i krangki tru.
Sapos PNG i laik kamapim wanpela jeneresen we bai i soim pasin na save em i winim las jeneresen ol i
mas givim kwaliti edukesen sevis. Sampela kantri i stap long narapela mak nau bikos ol tisa bilong ol i
winim sampela traipela mak long skul. PNG i gat sans long senisim kantri sapos em i givim kwaliti
edukesen long ol liklik pikinini long elementeri skul.
Pasin bilong ol tisa tu i mas stap long wanpela standet we bai i apim standet bilong edukesen na standet
bilong kantri.
Sapos skul pikinini i lukim tisa bilong em i kaikai buai na spet nabaut na slip long klasrum em bai i ting em
i orait samting long stap olsem? Ating em bai i askim bilong wanem na tisa i slip olsem long klasrum? O
em bai i askim tisa i save kisim potnait pe tu long lukautim em yet? Dispela ol tingting bai i stap wantaim
em long planti yia na bihain em tu bai i mekim sampela disisen long laip bilong em long bihainim pasin
bilong tisa o bihainim narapela rot.
Ating tisa i no inap long karim hevi? O em i les tasol? O ating sistem i no luksave long wok tisa?
Balob Tisa Koles husat i save trenim ol tisa bilong ol elementeri skul i bin mekim sampela paul pasin na
kisim nating ol lain long go skul. Dispela ol sumatin i no winim mak long hai skul na sekenderi skul. Ol i
mas kisim sampela moa skul antap long dispela long strongim ol yet pastaim long ol i go long skul bilong
kamap tisa.
Yunivesiti bilong Papua Niugini i tok ol sumatin i no kisim gutpela mak long go insait long yunivesiti.
Ating bai yumi sutim pinga long ol dispela sumatin? O ating bai yumi tok yunivesiti i apim GPA mak
bilong em na i mekim hat long ol sumatin?
Asua bai i go bek long taim dispela ol yangpela i stap long elementeri skul. Ol i no kisim gutpela skul
bilong strongim tingting bilong ol long lainim nupela samting na bilong helpim ol yet long painim nupela
save.

Wok tisa em i no bilong wok mani. Em i bilong helpim kantri i suruk wantaim gutpela save i winim ol
arapela jeneresen. Em i bilong lainim ol pasin webai i putim kantri long wanpela gutpela mak we ol
arapela i ken aigris o i ken rabim solda wantaim.
Dokta Uke Kombra i mekim stretpela pasin tasol sampela taim dispela kain muv i save kamapim sampela
arapela samting i hait.
Sampela samting em i kamap ples klia em ol tisa i slip long klasrum, na tu i gat ol giaman nem bilong ol
tisa long peirol, na long wankain taim sampela tisa i no kisim potnait pe na sampela taim em i ken abrus
na i no bihainim proses.
Tasol Dokta Uke Kombra i soim yumi pipel bilong Papua Niugini, yumi mas stop long giamanim yumi yet
na givim bel tru long kamapim wanpela strongpela kantri we i sanap antap long olgeta gutpela save yumi
bungim wantaim. Dispela bai i kamap sapos olgeta tisa koles i wok bung gut wantaim dispela edukesen
seketeri na mekim trupela wok we i sanap antap long kwaliti na standet em i antap moa.