PAIT namel long ol wanpisin, o traibel pait, em i wanpela hevi nesenel gavman wantaim ol provinsal gavman i mas stretim nau.

Olgeta mun i save gat ripot bilong traibel pait i kamap na ol manmeri na pikinini i dai. Ol arapela i ranawe i go hait long bus o i go stap long ples we ol i pilim olsem ol bai stap seif. Ol i kamap ol refuji long graun bilong ol yet.

Praim Minista bilong kantri wantaim wan wan MP i mas putim dispela hevi olsem bikpela ajenda bilong las palamen bipo long nesenel jenerel ileksen i kamap neks yia.

Praim Minista i tokim yumi long “Kisim bek PNG.” Sapos yumi laik kisim bek PNG, bai yumi ol Kristen manmeri i mas stopim ol dispela pasin we i egensim konstitusen na i brukim lo bilong kantri. Na Praim Minista i mas go pas long mekim dispela wok bilong kisim bek PNG.

Las wik yumi lukim ol piksa na ritim nius bilong narapela traibel pait i kamap long Tari, Hela provins. Ol 19 manmeri i dai na planti arapela i ranawe nabaut. Ol i stap wantaim pret na wari nau. Ol pikinini i no go skul bikos ol i pret long pasin bilong bekim ol birua bai mekim long ol. Na ol mama i no gat haus we ol i ken sindaun isi na lukautim famili bilong ol.

Dispela em i namba wan ripot bilong bikpela traibel pait long Hela long 2021, na yumi no save bai i gat moa pait i kamap bipo long dispela yia i pinis o nogat?

Ol politikal lida wantaim ol polis na komyuniti lida na sios na ol ovasis ejensi olsem United Nations, i helpim ol pipel na i toktok long ol rot bilong stopim dispela kain pait. Yumi no harim yet maus bilong Praim Minista long dispela bikpela hevi long ilektoret bilong em. Em i gat wanem kain plen long kisim bek ilektoret long han bilong ol trabelman?

PNG i stap long yia 2021 nau na traibel pait i wok long kamap yet. Watpo na ol politisen bilong ol ilektoret we traibel pait i save kamap oltaim, i no painim wei bilong stopim dispela pasin nogut?

Ol dispela lida i mas kamap hariap na kolim bel na statim wok bilong holim ol lain husat i kamapim trabel na givim long han bilong kot. I mas gat bikpela mekimsave bilong ol dispela kain lain.

Tupela yia i go pinis i bin gat ripot bilong narapela traibel pait long Hela tu we ol man i bin raunim wanpela ples na kilim nabaut ol meri na pikinini. Praim Minista i bin tok bai em yet i go na bringim ol dispela lain long han bilong lo. Olsem wanem? Ol i holim ol dispela trabelman pinis na sanapim ol long ai bilong kot o ol polis i wokim ol investigesen yet?

Hevi bilong lo na oda i gat planti as bilong en. Na hevi bilong traibel pait i gat rot bilong stretim. Namba wan rot em lo bilong gavman i mas gat strongpela tit long brukim dispela pasin nogut insait long komyuniti. Ol pipel bilong PNG em ol manmeri bilong sanap long strong bilong ol yet long wok na lukautim famili na ol pren na ol wantok. Kalsa bilong yumi i strongim pasin bilong yumi.

Tasol yumi no ken larim ol lesman na ol lain bilong brukim lo i bagarapim sindaun bilong yumi. Rispek, pasin bilong harim tok na moa yet, Kristen bilip bilong yumi, i mas stiaim yumi olgeta de.

Yumi holim strong ol dispela gutpela pasin na bai yumi ken kisim bek PNG na putim gen i go long stretpela rot. Yumi wetim Praim Minista long go pas long dispela bikpela wok bilong kisim bek PNG.