Long Pot Mosbi ol het tisa i het pen tru long inapim dispela  tok bilong Praim Minista na wankain taim tingim tok bilong Nesenel Pandemik Kontrola David Manning long bihainim nupela pasin bilong abrusim sik COVID-19.

Stat bilong dispela skul yia i kam wantaim planti salens.

Ol skul i pulap pinis tasol bihainim tok bilong Praim Minista ol i mas kisim moa sumatin. Na askim nau em sumatin bai i sindaun long we? Sampela skul i askim ol sumatin long karim desk bilong ol yet i kam long skul. Long ol yia i go pinis sampela skul i skulim ol pikinini aninit long ol diwai bikos klasrum i pulap tumas. Nau dispela yia em i hat long wanem ren i no stop yet.

Praim Minista i tokaut tu long Tuisen Fri Fi (TFF) mani we em i givim aut pinis. Tasol planti skul i tok ol i no kisim yet na ol i sotwin tru long wanem ol i nidim ol samting bilong statim skul gut. Sampela skul i stat wantaim draipela wara bil bilong Eda Ranu. Sampela i kisim notis olsem Eda Ranu bai i pasim wara insait long 48 aua sapos ol i no baim hariap tasol. Gavman i tok no gat long skul i sasim projek fi na skul edministreta i het pen.

Long ol Flexible na Open Distance Education (FODE) senta, maski gavman i tok no gat long ol papamama i baim skul fi, dispela skul i nidim tru planti helpim na em i mas sasim fi. Em i wanpela skul i givim seken sans long ol sumatin tasol em i no save kisim planti luksave long ol yia i go pinis.

Ol skul i kisim ol nupela sumatin long gret 9 na 11 i laik lukim skul setifiket pastaim na bihain ol bai i rejisterim sumatin. Tasol ol sumatin i no kisim ol skul setifiket bilong ol yet.

Long ol yunivesiti planti askim i go i kam nau long wanem kraiteria ol i yusim long kisim ol sumatin aninit long HECAS, TESAS na AES. Sampela sumatin i holim het bilong ol taim ol i luksave olsem ol i apim ol GPA mak long go insait long ol skul fi asistens program i go long 3.4 na antap. Sampela papamama i askim olsem wanem na em i hat tru nau long dispela taim long i gat ekses long yunivesiti edukesen? Tasol sampela i tok yunivesiti edukesen em i no bilong olgeta. I gat planti nid nau i stap long teknikel skil.

Long sampela provins lista bilong ol tisa long ol skul i no kamap yet. Skul i stat tasol tisa i no stap yet long skul.

I gat tok tu olsem tisa i sot. Ol lida bilong edukesen i tok ol greduet bilong yunivesiti i ken go tisim ol sumatin. Sampela savemanmeri bilong edukesen i salensim dispela tingting na tok save em i stap tasol pasin bilong lainim ol sumatin gut em bai i abrus long wanem greduet i no kisim trening bilong lainim ol sumatin.

I moabeta gavman i mas stop long givim het pen long ol tisa na skul edministresen na mekim wok bilong em gut. Em i mas lukluk long ol solusen bilong longpela taim. Pusim ol skul long kisim sumatin em i solusen bilong sotpela taim. We stap moa nupela klasrum na moa tisa wantaim trening na save bilong lainim ol sumatin? Populesen bilong ol yangpela aninit long 25 krismas i gro hariap tru na gavman i mas muv wantaim dispela senis.

Tupela piksa ol provinsal gavman i ken lukluk long en em Enga na Simbu. Ol gavana long dispela tupela provins i no wetim nesenel gavman. Ol i kirapim ol skul bilong ol yet.

Salens nau i go long olgeta memba bilong palamen long kirapim moa praimeri skul na teknikel skul long ol provins bilong ol. Kamapim ol gutpela gavanens sistem na strongim pasin bilong ranim skul gut wantaim tingting bilong givim kwaliti edukesen long ol sumatin.

Long ol famili ol papamama i krai long gavman i mas helpim wantaim skul fi. Ating em i taim ol papamama i stat tingting tu hamas pikinini ol inap lukautim na givim gutpela edukesen long ol. Long i gat pikinini long dispela taim i min mani na planti hevi long tingting.