POLIS fos bilong kantri i nidim strongpela na stretpela lida long go pas long wok bilong lo na oda.

Strongpela lida bai inap bungim olgeta opisa na biklain polisman na meri long mekim gut wok bilong ol. Polis Komisina em i namba wan polisman bilong Kwin, Nesenel Gavman, ol polisman na meri na ol pipel bilong PNG. 

Las wik nesenel kot i rausim Polis Komisina long wok bilong em bikos kot i tok em i no gat teseri kwalifiksen long holim dispela wok. Tupela senia polisman i bin kisim dispela keis i go long kot bikos polis komisina i mas gat kwalifikesen bilong yunivesiti long wanem em i holim tupela wok - Komisina na Seketeri bilong Polis Dipatmen.

 Dispela keis i soim ples klia olsem i mas gat senis i kamap long posisen bilong Komisina bilong Polis. NEC i bin wokim disisen pinis olsem man o meri i holim dispela wok i mas gat teseri kwalifikesen. Tasol NEC yet i no save bihainim stret dispela disisen bilong en. I bin gat ol arapela polis komisina husat i no bin winim skul long yunivesiti na digri, tasol ol i bin mekim gutpela wok olsem strongpela na stretpela lida bilong Royal Papua Niugini Konstabuleri (RPNGC). Teseri kwalifikesen bai mekim wanpela man o meri i kamap gutpela polis komisina o nogat?

Bikpela mani i go pinis long apim mak bilong i polisman na meri, na ol arapela wok bilong kamapim gut wok bilong lukautim lo na oda. Ating nau em i taim tu bilong senisim straksa bilong polis fos we i gat Seketeri bilong Dipatmen bilong Polis na i gat Komisina bilong Polis. Komisina i ken wanpela polisman husat i mekim wok bilong ranim polis fos na Seketeri i ken wanpela pablik seven husat i mekim ol pepa wok o edministresen wok bilong dipatmen.

PNG Difens Fos i gat dispela kain straksa pinis olsem na RPNGC tu i ken lukluk long en na mekim senis long mak bilong en. Brukim wok i go long tupela hap na bai i no gat ol kain salens olsem i kamap long bihain taim, o politiks i go insait na bagarapim wok bilong RPNGC.

Olgeta polisman na meri i mekim wok bilong ol long lukautim lo na oda. Ol i lusim dispela disisen bilong kot long han bilong ol asisten komisina na senia opisa long stretim wantaim Polis Minista na NEC.

Ol pipel bilong kantri tu bai pilim sampela pen long dispela disisen bilong kot long rausim polis komisina. Nau em i taim bilong COVID-19 na Polis Komisina i holim wok bilong Pandemik Kontrola tu. Bai gavman i mekim wanem long dispela wok bilong pandemik kontrola? Hia long PNG ol keis long Wes Nu Briten i wok long surik i go antap, tasol ol pablik i no kisim klia toktokt long wanem kain helpim na wokpainim COVID-19 tim i mekim long Wes Nu Briten.

I gat planti arapela askim na wanpela bilong ol em dispela ol veksin sut bilong banisim bodi long COVID-19. Wanem taim bai marasin i kamap long PNG na ol wok redi bilong givim sut i go long ol pipel. Bai kantri i nidim moa mani na sapot long mekim dispela bikpela wok. 

Yumi hop gavman bai i ken hariap long stretim dispela salens nau i stap long top wok bilong RPNGC na kantri i ken stap isi. I gat planti ol politisen tu wantaim ol saidlain polis opisa husat i mekim wok politiks long dispela keis. Mobeta ol tu i larim na RPNGC yet wantaim NEC i ken stretim dispela hevi. Nupela yia i stat nau na PNG i laik lukim ol gutpela senis na disisen i kamap long wok bilong Polis Fos na wok bilong banisim kantri long CVID-19 long dispela yia.