Dia edita,

Mi ritim stori bilong ol komyuniti long Buswara ausait long NCD na mi sori tru long ol. Kot i givim ol 120 de long ol i mas lusim dispela graun we ol i sindaun nau bikos em i graun bilong Nambawan Super.

Dispela hevi bilong ol i no nupela na i wok long kamap long planti hap long PNG tude.

Mosbi i wok long gro hariap tru na populesen tu i surik i go antap. Olgeta yia moa pipel i wok long kam long siti long painim wok o seif hap we famili bilong ol i ken stap. Tasol sori tru, i no gat graun moa long wokim haus olsem na planti i go mekim nating long ol blok ausait long siti.

PNG i nidim ol gutpela taun plena, ol akitek, ol sivil ensinia na bilding bod husat i ken lukluk long dispela hevi na givim sampela gutpela stia long kamapim ol nupela sabeb ausaut long mak bilong siti. I mas gat spes we ol pipel i ken wokim haus bilong ol long mak bilong mani ol inap long spendim.

Nesenel gavman na ol provinsal gavman tu i no ken slip tumas. Nogut ol i kirap nogut na painim olsem olgeta graun ausait long taun o siti em ol ovasis lain i kisim pinis.

Wanpela gutpela eksampel em long NCD. Bikpela hap graun tru stat long 7 Mile i go inap long 9 Mile em ol Saina i kisim na i wok long sanapim ol haus na ol bisnis. Ol i brukim ol maunten i go daun na levelim graun na skruim wok i go yet. Na gavman bilong yumi i aipas yet i stap.

Nau em i taim bilong kampim sampela gutpela senis. No ken westim taim long mauswara nating.

Mariana Bereta

Boroko

NCD