DISPELA yia 2021, em i las ful yia long laip bilong namba ten nesenel palamen bilong Papua Niugini.

Faivpela yia bilong en 2017 -2021, bai pinis nau na narapela nesenel jenerel ileksen bai kamap long
2022.
Long dispela yia, Ilektoral Komisin i mas stretim olgeta wok redi bilong 2022 nesenel ileksen i kamap.
Ol kain wok bilong apdetim ol komon rol bilong wan wan ilektoret em wanpela bikpela wok i mas
kamap wan yia pastaim long nesenel ileksen i kamap. Na bikpela taim na wok bai i mas go long
stretim baset bilong ranim 2022 nesenel ileksen.
Tasol sori tumas, ol wok bilong Ilektoral Komisin bilong namba ten palamen, i no pinis yet. I gat
wanpela bai ileksen bilong Mosbi Not- Wes bai kamap long mun Februeri o Mas. Bai- ileksen bilong
Bogenvil Rijonal sit we ol pipel bai vot long wanpela de, bai kamap neks wik, Janueri 20. Na Ilektoral
Komisin i mas kaunim gen ol vot bilong Kandep Open sit bihain long kot ov disputet ritens i givim oda
long mekim dispela wok na tokaut long wina bipo long 19 Februeri 2021.
Ol dispela ekstra wok Ilektoral Komisin i mas mekim long 2021 bai kostim bikpela mani gen. Ol i
wetim K6 milien long Treseri Diptmen long kaunim gen ol vot bilong Kandep Open.
Ilektoral Komisin i mas painim mani bilong wokim bai-ileksen bilong Mosbi Not-Wes. I no gat tok
long dispela, bikos siting memba i bin dai. Na long rijonal sit bilong Bogenvil, siting memba i bin risain
long resis long ileksen bilong Bogenvil Gavman.
I gat sampela askim long ranim ol bai-ileksen. Ol pipel i laik save watpo bai bai-ileksen i kamap sapos
i gat sotpela taim bipo long narapela nesenel jenerel ileksen i kamap. Bikpela mani bai lus long bai-
ileksen na nupela memba bai no gat taim long sevim ilektoret bilong em.
Na long ol kot bilong disputet ritens, sponsa bilong dispela kot keis i mas baim bikpela fi long kot i
harim disput bilong em. Tasol watpo bai kot keis i stap longpela taim na klostu long taim bilong
narapela ileksen kot i tokaut long disisen bilong en. Sapos komplenen i win na bai-ileksen i kamap bai
gavman i spendim moa mani gen. Na dispela keis we siting memba i risain long resis long narapela
sit, bai em i baim sampela penelti fi tu long Ilektoral Komisin o nogat?
I tru i gat ol lo i stap long bosim nesenel jenerel ileksen na ol bai-ileksen. I gat taim bilong harim ol
kot ov disputet ritens na i gat taim bilong pinisim olgeta disput bipo long narapela nesenel ileksen i
kamap. Kost bilong ranim nesenel ileksen na bai-ileksen em i antap moa. Kantri i no gat mani bilong
ranim ol ekstra ileksen. Ol memba i mas makim ilektoret inap moa long wanpela yia. Sapos taim i
sot, orait moabeta ol pipel i wet long narapela ileksen na makim MP bilong ol.
Planti yangpela manmeri tu i winim mak we ol i ken vot nau, tasol ol i no rejista yet. Nau em i taim
bilong Ilektoral Komisin long mekim ol awenes na stretim rot bilong 2022 nesenel ileksen.
Yumi hop ol wok bilong Ilektoral Komisin long redi long 2022 nesenel ileksen bai ran gut. Dispela
sans bilong ol pipel i makim MP bilong ol i save kamap bihain long olgeta 5-pela yia.