NUPELA YIA 2021 bai kamapim planti salens yet, tasol i gat planti ol driman inap kamap tru sapos yumi pasim tingting long wok strong long abrusim ol dispela salens. I gat planti ol bikpela hevi bilong  yia 2020 em yumi bai pilim yet long nupela yia.

PNG wantaim ol arapela kantri long wol i bin pilim bikpela pen na hevi sik coronavirus i bin kamapim. Ol kantri i pasim boda bilong ol na dispela i stopim ol pipel na bisnis long mekim wok na wokmani bilong ol kantri tu i pundaun.

PNG i bin laki tru na yumi mas tok tenkyu long papa God bikos dispela sik COVID-19 i no kilim planti manmeri long kantri. Tasol sori tru, ol arapela kantri long wol i kisim taim stret bikos sik i kilim planti tausen manmeri na bagarapim tru laip bilong ol. Long Amerika, COVID-19 i kilim pinis moa long 358,000 pipel long dispela wik na ol saintis na dokta i ting dispela namba bai i surik i go antap moa yet.

I gat hop olsem yumi ken winim COVID-19 long dispela nupela yia, bikos ol saintis i painim pinis ol veksin o sut marasin bilong banisim ol manmeri long dispela sik. Ol i bin tok orait long yusim namba wan veksin long mun Desemba 2020 long Amerika na nau Briten i tok orait long wanpela moa. Saina na Rasia na India tu i kamapim marasin bilong banisim manmeri long COVID-19.

Yumi no save wanem taim gavman bai inap kisim marasin bilong COVID-19 i kam long PNG. I luk olsem bai yumi wet longpela taim yet. Tasol yumi mas bihainim yet nupela pasin bilong stap seif - wasim han oltaim, putim mask long pes, stap longwe long ol arapela na kus i go insait long skru bilong han.

Dispela yia 2021 i bringim nupela senis na i kamapim ol nupela wei bilong lukautim sindaun bilong ol manmeri long PNG. Ol grasrut manmeri long ples i wokim gaden na planim kaikai bilong famili na bilong salim long maket tu. Ol grasrut long kain ples olsem Mosbi i sanapim liklik tebol maket arere long haus na salim wasa buai na smok. Ol dispela lain i save olsem i no gat wanpela maniman bai kam helpim ol. Ol i luksave bipo yet olsem laip bilong ol i stap long han bilong ol yet.

Wanpela bikpela senis i wok long kamap nau em planti ol liklik bisnis i yusim sosel midia long promotim ol samting ol i laik salim. Ol SME bisnis i skulim yumi ol arapela manmeri, long yusim mobail fon na nupela teknolji long maketim ol prodak. Ol benk na arapela kampani tu i opim rot bilong ol kastoma i yusim fon long baim ol samting, o baim bil bilong ol o baim tiket bilong balus. Dispela kain sevis i stap nau long ol siti na yumi hop bai i surik i go long ol arapela taun tu sapos i gat gutpela telekomyunikesen sevis na prais bilong en i stap daunbilo. Em i wok bilong nesenel gavman long lukluk long dispela samting.

Dispela yia 2021, em bai las ful yia nau long laip bilong dispela palamen bipo long 2022 nesenel ileksen i kamap. Em i gutpela sans long ol memba o MP bilong yumi long pinisim ol wok ol i bin promis long mekim long 5-pela yia ol i bin stap long palamen. Planti bilong ol i wok long stretim ol haus sik, skul, rot na bris na ol liklik ples balus long bringim sevis i go long ilektoret bilong ol. Sampela i bringim egrikalsa bisnis na opim rot bilong ol ples lain i painim mani.

Dispela yia, bai i gutpela sans tu long ol pipel i wokbung wantaim ol MP na kamapim gutpela senis long ol distrik na viles. Yumi mekim olsem na skelim sapos yumi makim trupela lida o nogat. Wok politiks i bin paul liklik las yia na yumi no laik lukim wakain hevi i kamap long nupela yia.

Ol pipel bilong PNG em ol manmeri bilong wok. Yumi holim strong ol gutpela pasin tumbuna bilong yumi na wantaim bilip bilong yumi olsem ol Kristen manmeri, bai yumi inap winim ol bikpela salens i kamap long dispela yia. PNG em yumi ya!