MUN Disemba i pulap long planti stori bilong ol indai i kamap long planti hap bilong kantri.

Bikpela sori em Papua Niugini i lusim wanpela trupela na strongpela lida bilong en taim Leit Sir Mekere Morauta i dai long las wik. Bodi bilong em bai i kam bek long kantri dispela wik na neks wik bai gavman i givim em stet funerel na planim em.

Leit Sir Mekere i dai bihain long sik i daunim em. Em i bin stap memba bilong Mosbi Not Wes taim em i dai.

Wantok Niuspepa  i tok sori tru long famili bilong em.

Narapela sori stori i kam long Goilala long Sentral Provins. Graun i bruk na karamapim wanpela kem bilong ol aluviel maina long Mande dispela wik.  Ol ripot i kam long Goilala i tok ol i rausim tupela tasol na narapela 8-pela ol i no painim yet.

Long hevi bilong ol kraim long krismas nait wanpela tisa meri long Madang i dai long taim man bilong em i sutim em long naip tupela taim long baksait bilong em.

Man bilong em i go givim em yet long polis pinis na ol pikinini i stap ol yet.

Long Pot Mosbi ol polis i ripotim 6-pela indai i kamap long krismas wik.

Ol polis i wok hat tru long daunim dispela ol hevi long olgeta hap bilong kantri.

Long ol krismas tok bilong ol, het bilong Katolik sios Kadinel Sir John Ribat na het bilong Luteran sios Rev Dokta Bisop Jack Urame i toktok gen long hevi coronavirus i bringim long kantri na i singaut long ol pipel i mas stap isi na bihainim gutpela pasin.

Rev Dokta Bisop Urame i apil long ol pipel i mas risponsibel na wok long helpim kantri. Em i tok ol pipel i mas selebretim krismas wantaim trupela pasin bilong bel isi, pogiv na stap gut wantaim wanpela na narapela.

Long krismas tok bilong em, Praim Minista James Marape i tok, krismas em i no sisen, em i taim bilong mekim gutpela pasin. Em i taim bilong mekim sampela disisen long laip na sampela taim sampela disisen i min yumi mas mekim sakrisfais.

Bipo long yia i pinis wanpela moa indai bilong COVID-19 i kamap. Dispela i surukim namba bilong COVID-19 indai long Papua Niugini i go long 9.

Lukluk bek long dispela yia, em i bin wanpela hatpela yia bilong kantri wantaim hevi bilong coronavirus.

Yumi hop nupela yia 2021 bai i narakain na bai i bringim gutpela sindaun.