Dia poro bilong Wantok Niuspepa.

Taim bilong tingim de bilong Maria I karim pininini Jisas long Betlhem em I kam nau tasol.

25 de bilong mun Desemba, Krismas De I mekim yumi amamas tru. Naispela bilas I kamap long ol stua na long planti ol haus bilong yumi. Yumi harim ol kwaia I praktis ol Krismas Karols. Pasin bilong Singsing Krismas Karlos wantaim kendel lait I kamap bipkela kastom bilong PNG. Ol pikinini praktisim danis na prosesio. Ol sios grup I redim lituji bilong lotu. Ol papamama I tingim kaikai bilong pestode na wanem ol presen ol bai givim long ol pikinini. Yumi olgeta bisi tru, tuhat stret, wok moning inap long nait, yumi filim strong I lusim mipela na bodi I filim pen long wok – tasol spirit bilong yumi I amamas.

Wankain olsem ol yia bipo, Pestode bilong Krismas I save bringim senis long laip bilong yumi. Liklik Beibi, Liklik Jisas I senisim graun olgeta. I tru, em i mirakel bilong Krismas yumi wetim olgeta yia. Em I olsem lait bilong star bilong skai em olgeta hap bilong graun I wet I stap long lukim. Na dispela yia 2020 mipela I nidim em moa moa yet. Mipela nidim em olsem lait bilong brukim pret na tudak bilong COVID-19. Human famili bilong graun olgeta I lukluk long Jisas, Ridima bilong yumi, bikos em I kam long dispela graun bilong helpim ol manmeri.

“Tasol ensel I tokim ol olsem “Yupela I no ken pret. Mi bringim gutnius I kam long yupela, em I nius bilong mekim olgeta manmeri I amamas tru. Long dispel de long taun bilong Devid, wanpela meri I karim pikinini. Na dispela pikinini bai I kisim bek yupela olgeta.” Lk 2: 10 – 11

Mi givim gutpela tok long you bai amamas bilong Krismas I pulimapim haus na family bilong yu. Bai em I helpim yu long painim bel isi. Bai em I strongim yu long autim gutnius long olgeta manmeri long tok na long pasin I tru. Bai em I helpim yu long wokabaut long Nu Normal wantaim strong na bilip.

God blesim yu,

Fr. Janusz