TAIM ol memba bilong palamen i no wanbel long Praim Minista o wanpela na narapela na ol i kirap na
wokabaut, husat bai i sindaun na was long haus bilong ol pipel?

Na taim ol pipel i raus long wok na painim hat long lukautim ol famili bilong ol husat i kea long ol?
Gavman i kirapim tu bel bilong ol pipel long go het wantaim ol Smol na Midium Entaprais (SME) na ol i
stap redi long mekim wok tasol ol i lukluk gen long ol lida long tupela kem na tingting planti.
Ol sios na sivil sosaiti i singaut strong long ol memba bilong palamen long sanap olsem lida na bihainim
pasin we bai i bringim gutpela sindaun long olgeta pipel.
Planti pipel i paul na lukluk tasol long piksa ol memba i wok long soim long ol. Ol i lukim dispela kain
pasin long 2011 pinis taim Peter O’Neill i bung wantaim Belden Namah na rausim Michael Somare. Nau
ol i lukim gen tupela seim man gen i bung na i laik rausim James Marape.
Tasol bikpela askim i sanap taim ol memba i ran i go long kot long kisim tok klia long wanem samting ol i
mas mekim. Taim spika I singautim palamen I kam bung gen long 17 Novemba na pasim baset, em I gat
pawa long mekim olsem? Ating em I gat pawa tu long pasim palamen long dispela yia na salim olgeta I
go bek na sindaun na kisim tingting bilong ol pipel? O long go bek long ileksen?
Aninit long demokresi taim ol memba i no bilip moa long Praim Minista ol i save mekim sampela samting
long rausim Praim Minista. Vot i nogat bilip em i wanpela rot o ol i ken stopim baset o ol i ken pulim ol
memba long gavman sait na daunim strong bilong Praim Minista.
Ol pipel I lukim oposisen I traim long stopim baset tasol gavman I kam bek na pasim baset. Nau ol I pilai
long namba I go I kam. Husat I kisim namba moa long 56 bai I fomim nupela gavman.
Taim dispela i kamap Praim Minista i save risain insait long Westminster sistem bilong gavman we Papua
Niugini i bihainim.
Tasol dispela i no kamap long PNG Westminster sistem bilong gavman. Tupela sait i bruk na wanpela i
go long Crowne Hotel long Pot Mosbi na bihain ol i go long Vanimo long Wes Sepik Provins na narapela i
go long Loloata ausait long Pot Mosbi.
Bikpela wok bilong lukautim haus bilong ol pipel i stap long Spika. Sapos ol memba i pilai planti o mekim
nabaut insait long haus na i no rispektim ol lo bilong dispela haus Spika i ken mekimsave long ol na
putim haus long oda gen.
Spika em i waspapa bilong haus bilong ol pipel na em i mas stap namel olgeta taim. Taim palamen i
makim wanpela i kamap Spika em i mas risain na lusim pati bilong em. Las spika husat i bin mekim

dispela em leit Bill Skate. Na long lukluk bilong sampela leit Bill Skate i bin holim balens insait long haus
inap em i lusim dispela sia.
Taim spika i no risain na lusim pati em i hat long em i stap namel long wanem pati politik i save pulim em
long mekim disisen.
Nau ol pati i bruk bruk na sampela memba i stap long gavman na sampela memba i stap long oposisen.
Em i rait bilong ol wan wan memba long mekim olsem. Tasol long soim ol pipel olsem ol inap stap lida
tru bilong ol, ol memba i mas soim hau tru ol bai i sanap strong long bringim sevis i go long ol pipel.
Ol sios na sivil sosaiti i singaut long ol lida i mas stop na tingim ol pipel pastaim. Ol i tok nau em i no taim
bilong pait long pawa. Bikpela hevi bilong coronavirus i stap yet na ol i mas stap isi na lukluk long
kamapim gutpela sindaun.