PALAMEN i bung gen long dispela wik long toktok long ol wok gavman i kamapim na tu long harim wari bilong ol ilektoret long maus bilong memba bilong ol. Dispela i nomol bisnis bilong Palamen.

Las wik yumi harim Praim Minista i toktok long mekim sampela senis long konstitusen o mama lo bilong kantri long tokaut olsem PNG em i wanpela Kristen kantri. Ol ripot i tok bai Praim Minista i yusim dispela bung bilong palamen long mekim dispela senis long konstitusen.

Senisim konstitusen bai i no inap long senisim nem nogut bilong PNG. Pasin bilong bekim dinau na kilim manmeri na ol pikinini bilong ol birua i strong yet. Pasin bilong sutim nating tok long sanguma na posin na kilim nating ol meri i stap strong yet. Pasin bilong karim kros pait bilong ples i kam long ol taun na siti i wok long strong yet.

Tasol i no gat pasin bilong lusim rong bilong ol birua. Pasin bilong sekan, tok sori na sindaun wantaim bel isi long komyuniti, i no strong tumas. Ol memba bilong Palamen i no save hariap long mekim strongpela toktok egensim pasin bilong kilim nating man. Gavana bilong Is Sepik na Gavana bilong NCD tasol i singaut long olgeta memba bilong palamen nau i mas opim maus na mekim wok long egensim jenda beis vailens long ilektoret bilong ol.

Las wik tasol, PNG i bung wantaim ol arapela kantri long makim de bilong stopim vailens egensim ol manmeri bikos long bilip long sanguma na posin. Ol sios na ol strongpela lida bilong ol komyuniti i laik stopim dispela pasin bilong satan. Ol i laik strongim bilip na pasin Kristen namel long ol manmeri long PNG. I no klia sapos ol memba bilong palamen tu i bin sapotim wok bilong sios o nogat.

Long dispela wik, ol man i kilim wanpela gret 12 studen bilong wanpela sekenderi skul long Tari. Ol wanskul bilong em i wari na ol i wokabaut i go lukim bodi bilong em long mog long haus sik. Ol studen i tok pasin bilong kilim nating man i mas pinis nau. Yumi hop ol memba bilong ol i harim krai bilong ol studen na go bek long ples long stopim dispela pasin nogut. Ol polis tasol i no inap long stopim ol hevi bilong lo na oda. Ol memba bilong Palamen i mas wok bung wantaim ol.

Long Trinde, kantri i makim Ripentens De. Em i de bilong skelim ol asua bilong yumi na pasim tinging long lusim ol pasin nogut na stap gut wantaim ol arapela manmeri. Dispela de i no wanpela pablik holide nating.

Sapos yumi senisim konstitusen na tok PNG em i Kristen kantri, bai dispela senis i rausim ol pasin bilong tudak o nogat? Yumi glasim na soim ples klia pasin tru bilong ol Kristen manmeri long laip bilong yumi. Yumi mekim olsem pastaim na ating bihain bai yumi inap long tok tru olsem, yes PNG i wanpela Kristen kantri.