OL yangpela pipel long PNG tude i no save bisi tumas long ol stori tumbuna. Ol i ting em i samting bilong bipo na bilong ol lapun tasol. Dispela i tru long ol taun na siti, tasol long ples ol pikinini i save laik tru long sindaun harim ol dispela naispela stori long maus bilong ol lapun bilong ples.

Tude Wantok Niuspepa tasol i save putim ol stori tumbuna long niuspepa long olgeta wik. Long taim namba wan niuspepa i bin kamap long 5 Ogas 1970, i no gat stori tumbuna long en bikos niuspepa i bin gat 16 pes tasol na sais bilong en i liklik tumas. Bihain long sampela yia, sais bilong niuspepa i kamap bikpela, em nau edita i askim ol rida long salim stori tumbuna bilong ol i kam long niuspepa.

Olgeta wik ol rida i save salim stori i kam long niuspepa na long taim Wantok i putim stori bilong ol, bai em i baim ol long K2. Long taim Wantok i mekim olsem, moa pipel i stat long salim ol stori tumbuna bilong ol i kam long niuspepa.

Wantok i bin luksave long dispela taim tu olsem ating bihain long 50 yia samting, bai ol nupela jeneresen bilong PNG i no inap save moa long ol stori tumbuna bilong ol. Ol senis i wok long kamap long dispela taim na ol pikinini i go skul na i no stap long ples we ol i ken sindaun arere long paia long nait na harim ol dispela naispela stori long maus bilong ol lapun.

I gat kain kain stori tumbuna bilong ol pipel bilong PNG. Sampela i stori bilong ples bilong ol i kamap olsem wanem. Sampela i stori bilong ol masalai na olsem wanem ol samting i kamap. Sampela i stori long strongpela lidaman. Sampela i stori long ol enimal na sampela em ol fani stori. Tasol i gat stori i givim tu stia long laip bilong ol pipel long ples.

Ol tumbuna i no raitim ol stori long pepa. Ol i harim long maus na putim long tingting, orait bihain ol gen i stori long ol pikinini bilong ol na bihain papa o mama i stori long pikinini bilong em. Ol i mekim olsem i kam na planti taim sampela stori long wanpela provins bai klostu i wankain olsem stori bilong narapela provins.

Sampela saveman na meri bilong ol ovasis yunivesiti husat i bin kam wok long PNG, i bungim ol stori tumbuna bilong PNG. Wanpela bilong ol em Thomas H Slone bilong USA. Em i bungim ol stori tumbuna bilong Wantok Niuspepa na i tanim i go long tok Inglis na i putim long wanpela buk, One Thousand One Papua New Guinea Nights, Folktales From Wantok Newspaper, Volume 1: Tales from 1972-1985 na Volume 2: 1986 -1997.

Olsem na ol manmeri husat i bin salim ol stori tumbuna i kam long Wantok namel long 1972 na 1997, i ken amamas olsem stori bilong ol i stap insait long dispela buk bilong Slone. Sampela stori i gat nem bilong man o meri husat i raitim, tasol sampela i no gat nem. Tasol ol dispela stori bilong ol pipel bilong PNG i bin kamap long niuspepa bilong ol PNG stret.

Anna Solomon i raitim