NUPELA Goroka maket long Isten Hailans bai kisim tu ol arapela kastoma sevis insait yet long maket.

Ol opisa bilong Goroka Rural LLG (GRLLG) husat bai i go pas long lukautim dispela bikpela maket i tok, Benk Saut Pasifik wantaim polis na opis bilong GRLLG bai i stap insait long maket eria tu.

Dispela em long mekim isi long ol kastoma i ken kisim sevis bilong benk, GRLLG na tu sevis bilong polis.

Tasol spes i gat tok na sampela manmeri i gat hevi long dispela.

Ol i tok spes i liklik na i no inap long kisim planti ol samting taim dispela ol arapela sevis i stap tu.

Helen Mopalo, wanpela meri grup lida husat i wanpela meri fama long Boda hauslain long Ifiyufa LLG eria i tok, olpela maket i bin i gat bikpela spes, na planti mama i bin kisim planti spes long sindaun na salim kaikai gut.

Tasol dispela maket bai givim hevi long spes taim ol i kisim ol arapela sevis tu.

“Lukluk bilong dispela nupela maket i gutpela tasol spes i givim hevi,” Mopalo i tok.

“Dispela bai mekim planti ol mama bai painim ples gen na salim kaikai bilong ol ausait long maket eria na ol ples nabaut.”

Mopalo i tok as tingting bilong kamapim ol maket em long salim ol fres kaikai na i no ol arapela kaikai bilong stua.

“Mi laikim olsem GRLLG i mas kamapim lo long stopim ol lain husat i save kisim ol kago bilong stua olsem ol trausis, siot, meri blaus, soks, naip, hama, tamiok, nil na ol arapela samting na salim long maket.

“Mipela mas larim spes i stap bilong salim fres kaikai tasol.”

Em i tok, GRLLG i mas kamapim narapela maket bilong ol lain husat i save salim ol kago bilong ol stua we ol bai i ken yusim.

Em i no amamas tu olsem provinsal atoriti i kisim longpela taim long opim nupela maket we wok i pinis sampela taim i go pinis.