Ol spots eksen poto bilong las wik i kam. Long dispela wiken bai ragbi lig wol kap i kamap long England olsem na lukaut long planti moa poto bai kamap long hia na insait long Wantok Niuspepa.

HETIM BAL: Wanpela beklain pilai bilong Amoana FC (raithan) i katim ai bilong flenka bilong FC Genesis na hetim bal i go ausait long fil taim em i kam klostu long gol mak bilong ol Amoana. Tupela i salens long raun tu gem bilong NSL sauten konfederesen resis long Mosbi las wik Sarere. POTO: Andrew Molen/ Wantok.

ANTAP TRU: Tupela pilaia bilong Matala i traim long pasim bal bilong spaika bilong Raukele Dolphins tasol em i abrusim banis bilong ol long kisim poin. Tupela i salens long semi fainel bilong ol man long primia divisen bilong Fairfax volibol kompetisen long Mosbi las wik Sande. Dispela Sande bai namba tu semi fainel bipo long gren fainel i kamap long wik i kam. POTO: Andrew Molen/ Wantok.

MANGI RUT 600: Ol ragbi lig sapota long PNG save kolim em ‘600’ bihainim rut bilong PMV kar i save ran i go kam long Kerema taun long Gulf provins na Mosbi. Dispela em long wanem mama bilong Xavier Coates em bilong Gulf provins. Coates i stap long PNG Kumuls skwat we i stap nau long England long pilai long ragbi lig wol kap. POTO: PNG Kumuls.

KILIA: Pilaia bilong NCD Souths (lephan) i no givim sans long birua bilong em bilong NCD FC long go kisim bal na i traim long pasin rot bilong em. Tupela i stap insait long namba wan gem bilong raun tu bilong Nesenel Soka Lig resis long Mosbi long las wik Sarere. POTO: Andrew Molen/ Wantok.

SMAIL TASOL: Ol meri pilaia bilong Raukele Dolphins i soim amamas bilong ol long kamap long pilai long semi fainel bilong Fairfax volibol kompetisen las wik Sande long Mosbi. POTO: Andrew Molen/ Wantok.

SALIM GO: Winga bilong PNG Kumuls, Alex Johnson i rausim bal i go bipo long em i bungim banis bilong wanpilai bilong em long Kumul, Lachlan Lam long wanpela trening bilong ol dispela wik long England. Ol i stap redi nau long go insait long namba wan gem bilong ol ragbi lig wol kap long Oktoba 19 agensim Tonga. POTO: PNG Kumuls.

WANPELA HAN: Bal i abrusim pinis seta bilong Matala tasol em i strong na tanim long baksait long paitim bal i go long sait bilong ol Raukele Dolphins. Pilaia bilong Dolphins, Rolly Forova i stap redi long pasim em. Ol i salens long semi fainel bilong primia divisen bilong ol man long Fairfax volibol resis long Mosbi. POTO: Andrew Molen/ Wantok.