PAPUA New Guinea Sports Foundation (PNGSF) i pasim olgeta veniu na sevis bilong em long kantri bihainim ol mesa bilong kontrola. Dispela sat daun bai pas inap long Oktoba 30 inap National Control Centre (NCC) na Kontrola i givim tok orait bilong opim bek.

Ekseketiv Dairekta bilong bilong PNGSF, Albert Veratau na Sekretri Jeneral bilong PNGOC, Auvita Rapila i bin bung wantaim NCC Niupela pasin tim long toktok long surukim gem bilong las wik Fraide. Dispela disisen bilong pasim ol

gem i givim bikpela hevi long ol spot komyuniti. Planti ol gem i stap klostu long taim bilong fainel taim dispela hevi i kamap. Long PNGSF na edministresin, spots em rot bilong ol long mekim mani na lukautim ol famili bilong ol. Na dispela lokdaun bai lukim planti wok lain i lusim wok bilong ol gen. Seketeri bilong PNGOC i tok planti spot i wok long redi long go insait long kwalifaing ivens, nesenel sempionsip na trials long kisim ol tim long go long Komonwelt gem na Mini Pasifik

Gem neks yia. Pendamik Menesmen Komiti Siaman bilong PNGSF na Sif Medikal Opisa, Dokta Kapua Kapua bai toktok wantaim Niupela Pasin na Deputi Kontrola na negosiet long dispela hevi. Tasol long dispela taim, namba bilong ol lain i kisim Delta Varient i go antap kwiktaim tru na dispela em bikpela konsen tru.  Ripot i tok haus sik i sot long oksijen, namba bilong COVID-19 i go antap, planti lain i no kisim veksin, ol haus sik i hat long lukautim ol sik lain na ol helt woka i sot.

Dispela i bringim namba bilong ol lain dai i go antap tru. Wantaim olgeta dispela, disisen i kamap long pasim pastaim ol spots veniu. Olgeta i mas mekim hap bilong ol long lukautim ol yet na banisim ol long kisim dispela sik nogut. Long 2020, PNGSF i bin namba wan dipatmen long lokdaun bihain long namba wan raun bilong COVID-19. PNGSF i wok klostu wantaim NCC na Provinsal Helt Atoriti long ol narapela provins long banisim ol pipel long kisim COVID-19.