JPG Waghi Tumbe i bin tait long eliminesen fainel bihain long autim Agmark Rabaul Gurias long las wik Sande long Nesenel Futbal Stedium. Rabaul Gurias i bin pilai strong long autim Mioks long hom graun wik bipo long pilai wantaim Tumbe na aut long eliminesen fainel.

Gurias i bin hatwok pilai wankain olsem Vipers long painim spes antap long top sikis resis bihain long Waghi Tumbe i bin rausim ol. Tumbe i bin stat strong wantaim olgeta fos long daunim strong bilong Gurias long namba wan hap inap gem pinis. Tupela tim wantaim pilai strong long hangamapim su o go het long prilimineri fainel olsem na sapot pulapim stedium long dispela resis namel long ol. Nathan Tente bilong Gurias i kisim ranawe trai long las minit klostu ful taim tasol i no inap abrusim Tumbe inap ful taim bikos skoa bilong tupela wantaim sanap olsem 18-8. Kosa bilong Waghi Tumbe Baundo Aba i tok olsem nupela kosa long bringim tim i kam olgeta long prilimineri fainel em bikpela samting long histori profail bilong em. Mista Aba i tok tenkyu long olgeta pilaia long putim moa strong na komitmen long bihainim gem plen na bikpela samting em taitim difens. “Mi i gat bikpela bilip long tim bilong mi long go insait long gren fainel tasol olsem nupela kosa bai mi traim long divelopim strongpela tim long trening taim,” Aba i tok. Em i tok dispela wik ol luk fowat long traim difens bilong Kroton Hela Wigmen bikos sapota bilong ol i save daunim pawa bilong narapela tim. Kosa bilong difending sempian Hela Wigmen Charlie Wabo i tok amamas long tim bilong em autim ol Gurias long elimininesen fainel tasol i gat bikpela wok stap em long traim senisim tingting bilong ol pilaia long taim bilong gem. “Mipela i save pilai bihainim gem plen tasol wanpela bikepla samting em tingting bilong wan wan pilaia insait long fil,” Wabo i tok. “Mipela bai traim wok long taim bilong trening na bungim Tumbe husat i gat strongpela difens tu long dispela wiken,” em i tok.

Jacklyn Kimala i raitim