MONI Plus Pot Mosbi Vipers i bin givim strongpela luk long ol Kroton Hela Wigmen long raun 8 bilong
Digicel Kap long las wik Sande.

Vipers i no bin statim sisen
gut wantaim 3-pela lus inap Joe Sipa kamap olsem nupela kosa na bin strongim lainap bilong tim long 3-
pela raun gem na lukim bikpela senis kamap namel long ol pilaia. Strongpela tim Kroton Wigmen i no bin
inapim strong Vipers no givim sans long Wigmen bilong ol wantaim Moni Plus Vipers taim Sipa bin
mekim wankain lain-ap bilong las tupelo raun. Kosa bilong Vipers Joe Sipa i tok tim stat long las tupela
gem kam antap ol bin pefom gut na winim gem bekim bilong 3-pela lus. “Mipela i bin daun long rak eria
na ABC difens olsem na mipela bin stretim dispela hap na wok long jenerel difens we i bin soim aut long
raun 8 gem,” Sipa i tok. “Ol pilaia nau i redi strong long bungim ol narapela tim ol i no bin bungim yet na
luk fowat long bungim Galp Isou long raun 9 long dispela wiken wantaim wankain muvmen na difens
pefomens,” em i tok. Em i tok apim nem bilong man ov mets Yunny Patrick husat i bin pefom long kisim
tupela penalti gol na helpim ol Vipers long nilim strongpela tim Wigmen. “Mi amamas long pefomens
bilong olgeta pilaia bikos no gat planti asua kamap namel long tim na mekim Wigmen tasol long givim
penalti,” em i tok. “Mipela bai wok strong yet long jenerel difens long bungim ol strongpela tim olsem
Muruks na Tigers long ol neks raun,” em i tok.

Jacklyn Kimala i raitim