PNG Air Nesenel Sempiansip i bin stat long las yia Disemba we nau bai lukim 27 nesenel skwat long olgeta hap bilong kantri bai go long Pot Mosbi na resis wantaim long namba wan hap bilong dispela PNG Air Grand Prix Siris.

PNG Air i bin sponsa long dispela Nesenel Sempiansip na bai bihainim wankain fomat go long bikpela intenesenel wan de miting we ol bai selektim ol namba wan etlit long resis wantaim.

Dispela Grand Prix em elit level kompetisen i gat tingting long ol etlit husat i pait long kisim ples insait long ol tim long intenesenel resis neks yia.

Presiden bilong Etletik PNG Tony Green i tok olsem bikpela samting em long lukautim ol etlit na fokas long trening bilong ol inap neks yia na ol etlit i luk fowat long dispela resis.

“Mipela inap long surukim dispela Nesenel Sempainsip bikos long sampela hevi ausait tasol bikpela tenkyu long PNG Air long sapotim mipela long bungim dispela nid bilong kompetisen gen long dispela taim,” Green i tok.

Em i tok strongpela kompetisen bai kamap namel long ol man sprinta wantaim ol sprinta bilong NSI Paias Wisil, Jonathan Dende na Alphonse Igish i redi long kisim ol Pot Mosbi beis sprinta na yangpela Graham Bai bilong Kimbe.

Ol man na meri long namel distens resis em tu bai kamap strong wantaim ol sprinta bilong Utmei bai kisim ol hailans beis etlit bihain long sampela gutpela taim long inta haus kanival bilong ol las wik.

Dispela kompetisen bai i gat tripela bung bilong tupela awa stat long 4 kilok apinun long Fraide go het long Sarere moning na las sesen long Mande moning.

Jacklyn Kimala i raitim