SIAMAN bilong Kumul Petroleum Holdings Limited Profesa Benedict Yaru (PhD) i bin kamap nupela Siman bilong Nesenel Skul Ragbi Lig (NSRL).

Siaman bilong PNGRFL Sandis Tsaka i bin tokaut long nupela siaman bihain long disisen bilong PNGRFL Bod long las wik Trinde long Nesenel Futbal Stedium.

Dokta Yaru i bin faunding Dairekta bilong KPHL Bod stat long 2013 i kam inap nau 2021 we em i kamap olsem Siaman bilong Petroleum Bod bilong ol Dairekta.

Yaru em bilong Par viles, Kompiam/Ambum Distrik, Enga provins husat i gat Dokta ov Filosofi (PhD) long Envaironmen long Yunivesiti ov Teknoloji long Sydney, Australia na Betsela Digri long Sains (BSC) na Masta Digri long Applied Sains long Lae Yunivesiti ov Teknoloji.

Siaman Tsaka i tok Dokta Yaru i gat bikpela save na i gat moa long 30 yia ekspriens long wok insait long Petrolium na Maining  Sekta long tupela sait wantaim olsem long operesenel  menesmen na konsaltensi long putim win long gutpela ples bilong lukautim ol NSRL Program long kantri.

“Yaru i gat gutpela save na edukesen we ol skul pikinini i ken lukim na lainim long em,” Tsaka i tok.

Em i tok Yaru i save bihainim ragbi lig long asosiesen bilong em Kroton Hela Wigmen olsem neming raits sponsa long Digicel Kap kompetisen, PNG Hunters na ol arapela ragbi lig program.

Tsaka i tok Dokta Yaru i bin go pas long ragbi lig olsem pilaia na kosa bilong Tarangau RFL long Lae long 1983 inap long 1991 na bihain wantaim ol Tabubil Ragbi Lig klap long 1993 inap 1996.

Tsaka i tok ol t biaimlong dispela KPHL skul konfederet na Nesenel Sempionsip bai kamaut wantaim ol arapela plen na program bihain long bung bilong Dokta Yaru na EMB.

“Ol PNGRFL Bod i welkamim Dokta Yaru olsem nupela siaman bilong NSRL na luk fowat long divelopim ragbi lig long ol skul na sumatin wantaim sapot bilong KPHL long level antap,” Tsaka i tok.

Dokta Yaru i tok tenkyu long bod long makim em olsem siaman bilong NSRL na em luk fowat long divelopmen na bungim ol salens bilong ol NSRL Program long kantri.

Jacklyn Kimala i raitim