KUMUL Petroleum Holdings Limited i bin sapotim Junia Ragbi lig Program wantaim K6 milien bihain long sainim 3-pela yia kontrak olsem Neming Raits Sponsa bilong ol skuls insait long Papua Niugini.

PNGRFL na KPHL i bin sainim dispela kontrak long divelopmen bilong skul program long kisim ol pikinini long pilai ragbi taim ol i liklik yet.

Sif Ekseketiv Opisa bilong PNGRFL, Stanley Hondina, i tok dispela sapot bilong KPHL long divelopim program, i go wantaim rifom insait long gavanens we PNGRFL i setim long ranim ol skul program.

Hondina i tok dispela sponsasip bai karamapim bihain long ol pilai provinsal tonamen na bihain long provinsal sempiansip. Bai gat ol konfederet sempiansip i kam aninit long KPHL neming raits sponsa olsem, KPHL Ailan Sempiansip, KPHL Momase Sempiansip, KPHL Hailans Sempiansip, KPHL Sauten Sempiansip.

“Mipela i wokim sampela veliu program we ol hai pefomens wokman na meri i ken go long trening na divelopmen bilong program we mipela i laikim long Hunters na Okid level,” Em i tok.

Em i tok bihainim long olgeta Konfederet Sempiansip, bai i gat Nesenel Sempiansip kam antap we bai foapela tim aninit long KPHL neming raits sponsa.

“Mipela i laik go daun long rurel ples na painim ol gutpela talen pikinini husat i save pilai long ol provins na traim long putim rot bilong ol yangpela skul pikinini,” em i tok.

Mista Sandis Tsaka i tok dispela sapot i kam long KPHL bai mekim ol elit program gohet na kirapim Nesenel Skul Ragbi Lig long kantri.

Em i tok dispela 3-pela yia kontrak sapot bilong KPHL bai yusim K2 milien long olgeta tupela yia na ranim ol skul kompetisen bilong ol pikinini long Anda 14, Anda 16 na Anda 18.

Jacklyn Kimala i raitim