BIKNEM fowat pilaia bilong Argentina na Paris St Germaine (PSG), Lionel Messi i kisim coronavirus (COVID-19) wantaim narapela tripela wanpilaia bilong em long PSG na em i stap long kwarentin nau.

Juam Bernat, Sergio Rico na Nathan Bitumazala i stap wantaim Messi long kwarentin na ol bai no inap pilai long Frans Kap gem wantaim Vannes long Mande. Sapos ol i test negativ bihain long wik antap bai ol inap long pilai wantaim Lyon long Sande 16 Janueri.

Messi i bin pilai long las sikispela gem wantaim PSG long Ligue 1 na Sempions Lig grup gem wantaim Manchester City na Club Brugge. Ol i bin lus long Man City na winim Club Brugge long dispela tupela grup stej gem bilong Sempions Lig.

Taim Messi i lusim Barcelona long Ogas long las yia na i kam long Frans, em i skorim sikispela gol insait long 16 gem bilong em wantaim PSG. PSG i ripot tu olsem fowat patna bilong Messi na straika bilong Brasil - Neymar i stap yet long haus sik long Brasil bihain long hevi em i bin kisim long lek bilong em.

Neymar i stap aut long etpela gem bilong PSG na em bai bungim ol gen long trening long tripela wik bihain.

Paris St Germaine i stap namba wan long Ligue 1 poin lata long 46 poin bihain long 19 gem. Ol i stap 13 poin antap long namba tu tim Nice long lata. Ol pilaia i kisim veksin long Frans na i test positiv long COVID-19 bai stap ol yet inap 7-pela de tasol na pilai gen sapos ol i kisim PCR test na i soim olsem ol i negetiv.

Long Sarere las wik, Frans i rekodim 219,126 ol nupela konfem keis bilong COVID-19 insait long 24 aua. Dispela em i namba foa de long kantri i rekodim moa long 200,000 keis.

PINIS.