TUPELA biknem pilaia bilong tenis i witdro long Tokyo sama Olympics dispela wik.

Twenti nain Gran Slam sempion Roger Federer na Britis namba wan Johanna Konta, tupela wantaim i witdro.

Federer i winim dabol gol long Beijing long 2008 na silva long 2012 na em i bin lus long singel fainel long Andy Murray.

Dispela pilaia bilong Switzerland, Federer, i gat 39 krismas. Em i gat hevi long skru bilong en olsem na em i witdro.

Konta husat i gat 30 krismas i kisim COVID-19 bihainim long em i witdro long Wimbledon taim wanpela memba bilong tim bilong em i tes positiv. Na ol i luksave long Konta olsem em i save stap klostu long tim memba ya.

Federer nau em i stap long namba 9 ples namel long ol tenis pilaia. Long 2020 em i kisim tupela sejeri long skru bilong em.

Insait long las tupela yia ol Gran Slam tali bilong Federer i putim em long wankain mak olsem Rafael Nadal bilong Spain long 2020 French Open na i no longtaim i go pinis em i kisim wankain mak olsem Novak Djokovic bilong Serbia. Djokovic i bin winim namba 20 meja long Wimbledon long 2021.

Bihain long em i lus long Hubet Hurkacz bilong Poland long kwata fainel bilong Wimbledon Federer i tokim ol ripota olsem em i no klia sapos em bai i pilai long SW19 gen.