OL opisa bilong spot long Samoa i kirap nogut long taim gavman bilong kantri i tokaut olsem tim bilong kantri bai i no inap long go pilai long Tokyo Olympics bikos ol i wari long COVID-19.

I no gat ripot bilong COVID-19 i kamap yet long Samoa.

Ol opisa bilong gavman i tok ol i mekim dispela disisen bikos COVID-19 i wok long kamap bikpela long Japan. Las wik Trinde, Tokyo siti long Japan i bin tokaut olsem i gat 714 nupela COVID-19 keis long wanpela de tasol. Dispela nius i mekim gavman bilong Samoa i tingting planti long na stopim tim bilong en long go long Japan.

Ol etilit na Olympic Komiti bilong Samoa i bin kirap nogut long dispela disisen bilong gavman. Man i go pas long tim bilong ol weitlifta, Tuaopepe Jerry Wallwork i tokim Pacific Beat olsem ol i wok long stretim rot bilong tim long go long taim ol i bin kisim dispela toksave bilong gavman.

"Mipela i kirap nogut long dispela las minit disisen bilong gavman,” Mista Wallwork i tok.

"Ol i no bin kisim tingting bilong mipela pastaim. Tasol bai mipela i toktok wantaim Nesenel Olympic Komiti."

Samoa i bin redi long kisim tripela wetlifta i go long Tokyo, wanpela bilong ol em Junior World Championship gol medal wina Don Opeloge.

Mista Wallwork i tok ol etlit i wari tru long dispela disisen bilong gavman.

"Mipela i bin mekim planti wok long las foapela yia. Mipela i gat ol etlit husat i ken winim ol medal, moa yet ol weitlifta.

“Mi sori tru long ol etlit na kosa huat i bin mekim bikpela wok tru long redi long dispela bikpela gem.”

Gavman i no tokaut long husast ol etlit tru bai i no inap go long Tokyo, tasol Samoa Association of Sports and National Olympic Committee (SASNOC) i tokaut olsem ol dispela etlit husat is tap long Samoa tasol bai i no inap long go. Dispela i karamapim ol tripela wetlifta, 8-pela etlit husat is tap long ol ovasis kantri o Japan.

Presiden bilong SASNOC, Patrick Fepuleai i tokim Pacific Beat olsem ol i redi long helpim ol etlit long Olympic Games.

Tim bilong ol man na meri long ragbi sevens i wok long trening i stap long Dubai bai i no inap long lusim dispela kantri inap long 27 Julai bikos long ristriksen bilong COVID-19. Ol i no kwalifai long tonamen long Monaco na nau ol i stap long Duabi na wet long ran bilog balus.

CEO bilong Pacific Rugby Players Welfare, Dan Leo, i tok ol i no save watpo na ol lain husat i bin plenim dispela tonamen i no bin mekim wok bilong ol gut na nau ol pilai i pas i stap long Dubai.

Ol Samoa komyuniti long Dubai i bin helpim ol pastaim na nau ol lain bilong World Rugby, Asia Rugby na UAE Rugby i wok long helpim ol.

Nick Fogarty - Pacific Beat