GOLP pilaia Jon Rahm i namba wan man bilong Spain long winim bikpela taitel bilong US Open.

Rahm i gat 26 krismas na em i bin abrusim Louis Oosthuizen bilong Saut Afrika.

Oosthuizen husat i bin gat foapela hol long pilai, i bin putim namba 17 we em bin nidim wan las birdie.

Rory Mcllroy na Bryson DeChambeau i bin salens tasol ol i no inap.

Win bilong Rahm i kam tupela wik bihain long em i bin test positiv COVID-19.

Rahm i tok bai em i selebretim dispela bikpela namba wantaim meri na nupela pikinini husat i gat tupela mun.

 “Mi gat bikepla bilip na bihain long sampela wik i go, mi bin stap positiv long COVID tasol mi save olsem bikpela samting bai kam,” Rahm i tok.

“Mi no bin save olsem samting bin kamap tasol mi save mipela kam long spesel ples bilong famili bilong mi.”

Rahm i dediketim dispela win bilong em go long olpela biknem pilaia, Seve Ballesteros, husat i bin dai long 10-pela yia i go pinis. Ballesteros i bin kisim faivpela meja taitel long golp wok bilong em tasol i no bin winim dispela US Open.

“Mi save gat hat taim long toktok bikos mi no bilip mi bin mekim dispela long kamap namba wan pilaia bilong Spain long winim dispela US Open,” Rahm i tok.

“Dispela win em i bilong olpela pilaia Seve husat i bin traim planti long winim dispela US Open taitel inap em bin dai.