TRIPLE 1 Polisi bilong Morobe Provinsal Gavman, aninit long lidasip bilong Ginson Saonu, i lukim 200
manmeri i bin greduet long Sande 14, Februeri long Wau rurel lokal level gavman.

Ol dispela 200 manmeri i bin kisim trening bilong kisim moa save long kamapim gut ol bisnis bilong
ol. Bihain long trening, ol i kisim setifiket.
Gavana Saonu i kamap wantaim dispela tingting bilong helpim ol pipel bilong Morobe long kamap
prodaktiv, gat moa mani, gat gutpela helt na kamap ol save manmeri long kamapim gutpela sindaun
we bai kontribiut i go long ikonomi bilong Morobe Provins.
“Triple 1 polisi bilong Morobe Provinsal Gavman i stap bilong mekim Morobe i sanap strong em yet,”
Gavana Saonu i tok.
Planti bilong ol lain husat i greduet ol i kam long Christian Church Patnasip Program na ELC PNG Paris
Kongrigesen long Wau.
Gavana Saonu i tok ol patisipen i bin kism trening bilong Litresi skil trening. Dispela em i gutpela
samting long ol pipel bilong Wau, bikos ol bai save long menesim bisnis na mani bilong ol.
Het trena Alfred Gase i tok wankain trening i kamap tu long Salamaua Lokal Level Gavman eria na ol
arapela ples long Morobe Provins.