EGRIKALSA bai kamap wanpela bikpela wok bilong helpim ikonomi na bai kamapim planti wok bilong ol pipel long Papua Niugini.

Dipatmen bilong Higher Education Research Science na Technology (DHERST) i sainim wanpela patnasip agrimen wantaim Westen Hailans Provinsal Edministresen we ol i lukluk long trenim moa yangpela manmeri long wok bilong egrikalsa.

Sekreteri bilong DHERST Profesa Fr Jan Czuba i pasim wanbel wantaim WHP Edministresen long Mande dispela wik.

“Kantri bilong yumi i gat wanpela gutpela klaimet we planti ol gutpela bus, graun, diwai na ol enimal i ken stap long en. Egrikalsa em wanpela samting we i bin helpim kantri bilong yumi long planti yia i go pinis,” Fr Jan i tok.

“Egrikalsa i ken kamap wanpela bikpela indastri bilong helpim ikonomi insait long PNG.

“Mipela i no gat planti sumatin i go skul long egrikalsa. Planti i ting olsem egrikalsa em i wok bilong kamapim kaikai na lukautim ol abus tasol. Egrikalsa em i gat planti kainkain han bilong wok long en na ol sumatin i ken lainim planti samting em i ken helpim ol long painim wok tu.” Fr Jan i tok.

Dispela wanbel i opim rot bilong DHERST na WHP Edministresen long lukluk long sampela bikpela tingting olsem egrikalsa trening na wok bilong kamapim Hailans Egrikalsa Kolis long bihain, ol rot bilong skul, kain olsem ol skolasip na ol nupela ol haus na opis bilong Haia Edukesen Institut insait long Westen Hailans Provins.

NEC i bin kamap wantaim wanpela tingting bilong senisim na mekim haia edukesen sistem bilong PNG i kamap gut.

Dispela em namba wan patnasip we i kamap namel long DHERST na wanpela provinsal gavman. DHERST bai i lukluk tu long ol arapela provinsal gavman long mekim wankain wok.

Dispela wok bung namel long DHERST na WHP Edministresen em i strongim gen wok bilong Marape-Steven gavman bilong mekim gutpela rot bilong ol sumatin long kisim gutpela skul na mas gat planti sumatin i greduet wantaim gutpela pepa bilong wok.

James Sapan i raitim