MENESING Dairekta bilong Nesenel Egrikalsa na Kwarentin Inspeksen Atoriti (NAQIA) i tok maski gavman i no givim mani, ol bai go het yet long mekim wok long sekim na daunim Afriken Swain Fiva (ASF) long kantri.

Em i tok liklik mani ol i gat, em ol i wok long yusim tasol i no save sapos gavman bai givim mani olsem em i bin makim long 2020 baset.

Em i tok sapos ol i no mekim gut wok, dispela sik i ken bagarapim ol samting na sindaun bilong ol pipel.

Mista Alu i tok taim ol i painim aut dispela sik long namba wan taim long Sauten Hailans long Mas, 2020, NAQIA i yusim olsem K2.4 milien long mekim wok kamapim ol kwarentin na testing fesiliti, ol rot blok, mekim ol awenes wok na salim ol dokta bilong enimal long go na sekim ol provins husat i gat ASF.

Em i tok long Epril, kebinet i bin tok orait long K2.3 milien (K1 milien long Dipatmen bilong Egrikalsa na K1.3 milien long Dipatmen bilong Treseri Konsolidetet Revenu Fan) long helpim long pait egensim ASF long Hailans rijon tasol gavman i no givim dispela mani yet.

“Olsem baiosekuriti o was bilong kantri, em wok bilong NAQIA long was na lukautim kantri olsem kain kain sik i no ken kam insait na bagarapim ol enimal, bus graun na sindaun na laip bilong manmeri,” Alu i tok.

“Mipela bai i no stap bek na wet long gavman long givim mipela mani, olsem na mipela bai mekim wok.

“Liklik mani mipela i gat em mipela bai mekim wok long stopim na kontrolim ASF,’’ Alu i tok.

Em i askim Dipatmen bilong Treseri na Laivstok Divelopmen Kopresen long givim olsem ol i ken mekim wok gut.

Em i tok klostu taim Egrikalsa na Laivstok Minista John Simon bai tokaut long NAQIA i sekim Jiwaka Provins long ASF.

Willie Brul i raitim