Gavman i tokaut long apim 'minimum wage' o daunblo mak bilong pei bilong ol wokmanmeri insait long kantri.

MINISTA bilong Leba na Emploimen, Kessy Sawang i tok National Tripartite Consultative Council (NTCC) bai tokaut long apim K3.50 ‘Minimum Wage’ long Mas, 2024.

Mis Sawang i tok ol i kamapim ol Tems ov Refrens (TOR) long wanem mak gavman inap putim long helpim ol wokman na meri long kantri.

Em i tok NTCC em i wanpela gavman bodi i go pas long mekim dispela wok.

Dispela grup i gat ol mausman bilong ol woklain na ol lain bilong givim wok.

Mis Sawang em i siameri bilong dispela grup.

 Mis Sawang i tok ol woklain long kantri i mekim planti askim long senisim o apim dispela K3.50 ‘Minimum Wage’.

“Praim Minista James Marape i tok wanpela plen bilong gavman long dispela yia em long senisim dispela K3.50 Minimum Wage long kanri.

“Bihainim toktok bilong PM, NTCC bai holim wanpela kibung long 15 Mas, 2024.

Wanpela ajenda bilong dispela bung em long ‘Minimum Wage’.

“Bihain long dispela bung, bai yumi tokaut long ol senis yumi kamapim long Minimum Wage bilong kantri,” em i tok.

Misis Sawang i tok long senisim ‘Minimum Wage’ bilong kantri, i mas gat ol TOR.

“Mi amamas long tokaut olsem yumi kamapim pinis ol TOR na long mun Mas bai mi toksave long ol senis kansil i mekim,” em i tok.

PINIS.