Gavana bilongIs Sepik provins, Allan Bird i stap redi nau long salensim James Marape long kamap Praim Minista. Em i kisim sapot bilong ol memba bilong Oposisen long go pas long ol long Vot i no gat bilip.

REDI LONG SALENS: Gavana Bird (sindaun long raithan) wantaim ol arapela memba bilong oposisen i tokaut long tingting bilong ol long salens gavman long vot i no gat bilip. POTO: Ezekiel Lawrence/ Wantok.

Lina Keapu i raitim

OPOSISEN I makim Gavana bilong Is Sepik, Allan Bird long kamap Praim Minista sapos ol i vot I no gat bilip long Marape Gavman.

Long Tunde 1:45pm, Oposisen i givim pepa bilong ol long Ekting Spika bilong Palamen, Koni Iguan long vot no gat bilip.

Nupela lida bilong Oposisen na Memba bilong Kiriwina-Godenough, Douglas Tomuriesa i mekim toksave olsem ol i makim Mista Bird long kisim wok bilong Praim Minista.

Em I tok olgeta MP long Oposisen i sapotim Mista Bird.

Moa long 12-pela MP I sainim pepa na ol i givim long Ekting Spika.

Bipo long Spika i toksave long Palamen long em i kisim mosen, Lida bilong Gavman Bisnis, Renbo Paita i putim wanpela mosen long plus long rausim, Mista Bird olsem Siaman bilong Praivet Bisnis Komiti na putim Gavana bilong Gulf, Sir Chris Haiveta.

Narapela senis Gavman i mekim em ol i rausim Memba bilong Ambunti, Johnson Wapunai olsem Asisten Spika na putim Memba bilong Mul-Baiyer, Jacob Maki.

Mista Paita i bin toksave long Palamen tu, olsem Memba bilong Pomio, Elias Kapavore bai kisim ples bilong Mista Bird.

Long 3:23pm bipo long Ekting Spika i bin pasim bung bilong Palamen, em i toksave olsem em i kisim mosen long ol Oposisen long putim vot i no gat bilip long Mista Marape.

Mista Iguan i tok, “Yupela olgeta i save i gat proses long bihainim Seksen 145 bilong Mama Lo, Standing Oda na Suprim Kot disisen.

“Dispela toksave bilong mosen em i impoten long kantri na bai go long Praivet Bisnis Komiti long lukluk long en.

“Bipo long dispela, mosen bai go stap long Notis Pepa long 7-pela de.

“Long Trinde (14 Februeri) Praivet Bisnis Komiti i bung long kliarim notis we bai ol i lukluk gen long Seksen 145 bilong Mama Lo na Standing Oda.

“Taim Notis bilong Mosen em i stret na Komiti i wanbel, bai ol i givim long klek long givim long Palamen.

“Klek bilong Palamen bai putim gen long Notis Pepa we bai kamap long narapela de bilong bung,” Mista Iguan i tok.

Mista Iguan i tok bai ol i lukluk long neks wik Fonde long toksave long Palamen long adjen inap ol tupela sait wantaim i go bek na vot long senisim gavman.

PINIS.