Gavman i tok long helpim ol bisnis we i bagarap long hevi we i bin kamap long Janueri 10, 2024 long NCD na sampela ol arapela provins.

PAIA: Planti bisnis long Mosbi olsem Papindo Supamaket long Gerehu i lusim planti samting taim ol pipel i brukim banis bilong ol i go insait na kisim ol samting. Bihain paia i kukim ol stua bilong ol i go daun. POTO: Andrew Molen/ Wantok.

LONG dispela wik kabinet I tok em bai lukluk long helpim ol binis husat i kisim bagarap taim trabel i kamap long Mosbi na sampela provins long Janueri 10, 2024.

Praim Minista James Marape i tokim Palamen taim Memba bilong Mosbi Not-Is, John Kaupa i askim sapos gavman i gat plen long luksave long ol bisnis husat i kisim bagarap.

Mista Marape i tok ol i putim pinis wanpela pepa i go long Nesenel Ekseketiv Kaunsil (NEC) long lukluk long givim sapot long ol dispela binis.

Em i tok disisen bilong dispela bai kamap long Trinde dispela wik.

Mista Marape i no tokaut long hamas mani gavman bai givim long ol dispela bisnis tasol em i tok ol ripot i soim olsem ol bisnis i lusim K480 milien long ol kos bilong ol samting i lus.

“Mi laik tok sori long olgeta bisnis komyuniti long bagarapim wok bilong ol manmeri na bisnis bilong yupela.

“I gat wanpela pepa i stap pinis long lukluk long dispela hevi.

“Mi stap long kabinet nau moning (Tunde) long toktok long dispela tasol yumi pasim gen na kam long Palamen.

“Mipela bai bung gen long Trinde na tokaut long mani mak bilong helpim ol dispela bisnis,” em i tok.

Mista Marape i tok edministetiv investigesen i kamap pinis na ripot bilong dispela bai kamap long Trinde tu.

Em i tok wanpela komisen bilong inkwairi i kamap pinis tu long lukluk long olgeta polis operesen.

Em i tok dispela i go wantaim investigesen bilong polis long lukluk long as bilong dispela hevi.

“Mipela no lukluk long dispela olsem wanpela liklik samting.

“Husat ol lain stap long kamapim dispela hevi bai kisim sas,” em i tok.

 PINIS.