Gavana bilong Is Sepik provins i sanap makim oposisen long traim na winim James Marape long kamap Praim Minista insait long 'Vot i no gat bilip'.

TRAIM GAVMAN: Gavana Allan Bird i givim toktok bilong em long Palamen dispela wik. POTO: National Parliament.

Lina Keapu i raitim

GAVANA bilong Is Sepik, Allan Bird I kendidet bilong Oposisen long kamap Praim Minista long vot ino gat bilip .

Mista Bird i amamas long bilip bilong ol Memba bilong Oposisen na em i tok bai em i kamapim senis long 18 mun sapos em I kamap Praim Minista.

Memba bilong Kiriwina-Goodenough, Douglas Tomuriesa, na Oposisen lida i tokaut long laik na tingting bilong ol long Mista Bird, bikos ol i gat bikpela bilip long em.

Mista Tomuriesa i tok, taim ol i laik makim Bird, olgeta yet wanbel na makim em.

“Taim mipela i toktok namel long mipela yet, mipela i wanbel na makim em.

“Mipela laik ol samting i senis long wanem ol manmeri i kisim taim long baim kaikai long stua, haus sik, skul na ol narapela ol samting.

“Mipela i no wari long mani bag bilong ol, mipela laikim ol pipel bai amamas.

“Longpela taim nau, yumi lukim olsem ol liklik manmeri i kisim taim. Nau em taim long senisim ol samting na kamapim gutpela sindaun long ol pipel,” Mista Tomuriesa i tok.

Mista Tomuriesa i singaut long ol nupela ol MP long tingting gut na mekim disisen bilong ol.

Tupela Praim Minista bipo Sir Julius Chan na Peter O’Neil i givim sapot bilong ol long Mista Bird. Sir Julius i givim sampela skul toktok long Mista Bird long kisim na wok long en.

Oposisen i stap wantaim 23 MP na ol i lukluk long moa MP i joinim ol.

Long narapela sait, Praim Minista James Marape i kisim dispela mosen notis wantaim bel isi.

Mista Marape i tok, “Olgeta samting save kamap long plua bilong palamen na bai yumi lukim long namba bilong pati na kolisen tu.

Em i tok, nau yet ol i gat 87 Memba long Gavman na em i bilip olsem ol bai kam bek gen long pinisim wok ol i statim long 4-pela yia go pinis.

Mista i tok bai ol I wok strong nau na no inap wetim narapela 10-pela yia long lukim senis.

“Yumi sindaun long taim bomb we yumi mas stretim na no ken wet gen.

“Dispela olgeta salens yumi lukim nau em i daunim yumi na Gavman i mas mekim gut samting .

“Dispela pait i no bilong mi o bilong Mista Marape tasol, em i pait bilong ol pipel.

“Mi save olsem, i gat ol MP insait long Palamen husat I gat wankain tingting we mipela i save pait long en, na mipela yet i no save wanbel.

“Ol pipel bilong yumi laik gutpela laip, gutpela sindaun wankain olsem yumi stap.

“Mi save sem taim mi lukim ol pipel i painim hat long helt sevis, skul na baim kaikai long stua na maket.

“Mi save tingtim olsem, mi gat gutpela samting, kaikai gut na ol pipel bilong mi husat makim mi i kisim taim,” Mista Bird i tok.

Mista Bird i tok, wanpela man i no inap passim yumi.

“Ol pipel bilong yumi long ples i laik fridom bilong ol na ol risos bilong ol yet long stap gut.

“Yumi ol MP i gat wok long mekim na dispela ol wok em long sevim ol pipel bilong yumi.”

PINIS.