Ol pipel nilong Upper Nipa long Sauten Hailans i laik lusim provins na joinim ol wantok bilong ol long Hela bilong wanem ol i laikim moa sevis i go long ol.

Joseph Dawai i raitim

MOA long 36,000 pipel bilong Up­per Nipa insait long Sauten Hailans provins i laik go stap wantaim traib bilong ol long Hela provins.

Ol komyuniti husat i stap long boda bilong Magarima Distrik insait long Hela provins na ol i bin go long Nipa i laik go bek long Hela.

Wod Kaunsila bilong Upper Nipa, David Navuri tok 36,000 pipel bilong 16 wod kaunsil i no bin kisim gavman sevis longpela taim na ol i laik lusim Mendi na go bek bungim ol traib bi­long ol long Hela.

“Mipela ol pipel we Sauten Hailans i bin lustingting long mipela long taim bilong Nesenel ileksen, mipela i bin lukim balot bokis na vot tasol no gat man i luksave long mipela,” em i tok.

Mista Navuri i bin stap tupela tem na bipo em i bin stap olsem kaunsil presiden bilong Nipa Basin Lokal Level Gavman (LLG).

Em i tok ol pipel long Upper Nipa i mekim disisen bilong ol pinis long go joinim hap traib bilong ol long Magarima distrik.

“Mipela i bin kam long Hela na olgeta manmeri bilong mipela i stap long Magarima, Komo, Tari, Koroba na ol arapela hap bilong Hela,” em i tok.

Mista Navuri tok Paru traib insait long Upper Nipa i gat ol haus lain i stap long traib long Homo Pawa insait long Magarima na Koroba long Koro­ba/Kopiago distrik.

Em i tok ol arapela wankain traib insait long Hela olsem Taputa i stap long Wabai na Togobi, Totomu, Ti­gibi long Magarima na Tari, Larop long Beneria na Komo, Ipana long Komo na Nogoli, Enjamungan long Magarima na Upper Wage, Tolom long Magarima, Luwim Keprop long Magarima na Upper Wage, Suma long Lower na Upper Wage, Tari.

Ungubi na Haralinja traib long Magarima, Homo Pawa na Beneria.

“Kantri bai amamasim 48 Indepen­dens aniveseri na olsem independens presen bai mi askim Gavana William Powi na lokal Memba, Dokta Billy Joseph long lusim mipela i go.

Mista Navuri tok sampela wok bi­long stretim baundri bai ol i ken me­kim bihain long wanem ol i les pinis long stap olsem.

PINIS. //