Ol kalabus long Jomba polis stesin long Madang taun i no gat kaikai na Gavana bilong provins, Ramsey Pariwa i helpim wantaim ol kaikai na saplai.

Jomba Polis Stesin Sinia Sajen, Dick Gigino (lephan) i kisim ol kaikai long Ricky Mombi husat em i Ekseketiv Opisa bilong Opis bilong Madang Gavana. POTO: James G. Kila.

James G. Kila i raitim

Gavana bilong Madang, Ram­sey Pariwa long las wik Fraide, Julai 7 i bin givim sampela kaikai go long Jomba polis ste­sin bilong helpim ol kalabus manmeri long hap.

Ekseketiv Opisa bilong Ga­vana, Ricky Mombi bin bringim dispela ol kaikai go givim long ol polisman husat i save lukau­tim Jomba polis stesen sel blok.

Mista Mombi tok dispela helpim opis bilong Madang Gavana i givim, i kamap bihain long wanpela askim i kam long Jomba Provinsal Polis hetkwata long Madang.

Ol i tokaut olsem ol i gat hevi long sait long mani insait long las tripela mun na tu ol i gat dinau wantaim stua we i save givim kaikai go long ol.

Nau yet dinau wantaim dispe­la stua i stap olsem K3,000.

Moa long en, Jomba Polis Stesin sel i wok long bungim hevi long sait long givim kaikai long ol kalabus lain long tripela taim long wanpela de.

Dispela i mekim na ol kala­bus lain i save wetim ol famili memba bilong ol long ausait long bringim kaikai go givim ol long sel.

Ol polis i luksave olsem dis­pela em i no gutpela na seif tu­mas na ol kalabus lain i ken hait na ranawe.

Insait long wanpela leta we Sinia Sajen Dick Gigino, husat em i ekting Sif Inspekta wan­taim Pablik Sefti Yunit long Jomba Polis Stesin, i tok sel blok nau yet i holim total olsem 56 kalabus lain.

Namel long ol dispela kalabus em tupela meri.

Ol i gat sampela kalabus lain tu i kam olsem long Beon Ko­reksenal Sevis (CS) haus kala­bus i stap long hap.

Wanpela hevi em long sait long trenspot long bringim ol i go kam bilong wanem fiul em narapela hevi.

Olsem na namba bilong ol ka­labus lain long Jomba i save go antap olgeta de.

Mista Mombi tok Opis bilong Madang Gavana i luksave olsem hevi long sait bilong kaikai we ol kalabus lain i ken kotim polis na gavman, sapos ol i no kisim kaikai tripela taim long wanpela de.

Moa long en, dispela 50 lain i stap long Jomba sel em ol i me­kim ol bikpela trabel tru olsem kilim man na ol arapela hevi.

Gavana Pariwa i laik lukim olsem lo i mas kisim mekim­save long ol dispela pasin we i apim tru hevi bilong lo na oda nau long Madang provins.

Mista Mombi tok Opis bilong Gavana i bin kisim askim i kam long Sinia Sajen Gigino long Ju­lai 4 na wantu tasol long Julai 6 em i bekim na go baim ol kaikai, na long Julai 7 em i bringim i go long Jomba Polis Stesin.

Mista Mombi tok tu olsem nau yet Opis bilong Gavana i gat hevi long sait long mani bilong wanem 2023 Provinsal Baset em ol i no stat long yusim yet.

Long dispela as na opis i ki­sim helpim i kam long ol divel­opmen patna long helpim ol long baim kaikai long givim i go long Jomba Polis stesin bi­long ol kalabus lain.

PINIS.