Wok bai stat nau long rot namel long Bokaidu na Tolukuma bihain long ol papagraun i wanbel na givim tok orait long wok i kirap long en.

OL papagraun bilong Bokaidu-Tolukuma rot projek eria long Kairuku na Goilala distrik long Sentral Provins i givim tok orait long wok i stat long rot bilong ol.

Bikman bilong ples Foleka Deva Deva long Kuni Lokal Gavman (LLG) Albert Mara wantaim presdien bilong Woi­tape LLG na papagraun bilong Tolukuma Mine, Fabian Aia, i tok amamas long dispela rot projek. Ol i tok dispela rot bai helpim gut tru long bringim se­vis i go long ol pipel bilong ol.

Ol i tokim tim bilong gavman em Mineral Resources Authori­ty (MRA) i bin go pas long en, las wik olsem ol pipel i bin wet planti yia long dispela projek i stat.

Ol i tok ol i laik dispela rot projek i mas stat hariap na bai ol pipel i ken benefit long en.

Sif Mara i tok ol pipel bilong em i redi tasol long givim han long nesenel gavman na praivet kontrakta mekim ol wok long rot.

Em i tok 27 wanpisin bilong ol i bin bung na kamapim 5-pela bikpela grup na i redi long sta­tim wok.

Ol opisa bilong MRA, PNG National Forest Authority (PNGNFA), Department of Works (DoW) na Forestri Sek­sen bilong Sentral Provinsal Gavman i bin bung wantaim ol papagraun long Foleka Deva Deva na long Kubuna Katolik Peris wantaim ol stekholda bi­long projek.

Ekseketive Menesa bilong Divelopmen Kodinesen Divisen bilong MRA, Andrew Gunua, i tokim olgeta lain long wokbung na bai dispela projek i karim kaikai.

Em i tok ol papagraun i mas wanbel na wokbung wantaim ol stekholda na bai ol i ken winim dispela mak bilong kamapim projek.

Mista Gunua i tok bai ol i mekim sevei long graun, for­estri inventri na asesmen long ol ikonomik diwai long dispela eria we rot bai ran long en.

Em i tok Department of Lands & Physical Planning bai mekim sevei long graun, na PNGFA bai mekim fores inventori.

PINIS.