Wok painimaut i kamap nau long dai bilong tupela PNGDF soldia we i bin kamap long wanpela trening program long las wik.

PNGDF bai lukluk long asua i stap long we na i kamapim hevi bilong dai bilong tupela soldia long trening las wik. POTO: US Embassy PNG, Solomon Islands and Vanuatu website.

Lina Garry i raitim

PAPUA NUIGINI Difens Fos i sta­tim wanpela wok painimaut long dai bilong tupela soldia na wanpela siv­ilien husat i kisim bagarap long taim bilong trening bilong ‘Koporel Kwal­ifing Fainel Fil long ples Bokuku long Kupiano long Sentral provins.

PNGDF Komanda, Meja Jeneral Mark Goina i tok, ol toktok bilong dispela hevi i no stret yet olsem na bai ol i lukluk gut long wanem as tru dis­pela dai i kamap.

Mista Goina i tok, ol i salim pinis wanpela tim long Murray Bareks i go long Kupiano long statim wok paini­maut long hap hevi i kamap long en.

Em i tok, ol i givim 14 de long kari­maut wok painimaut bilong dispela hevi na i wetim ripot tasol.

“Dispela tupela soldia husat i dai em wanpela bilong HMPNGS Taraun­gau husat i wok olsem Leading Sea­man, na narapela em wanpela Instrak­ta long Goldie River Trening Kolis.

“Narapela tupela, husat i kisim bagarap em wanpela soldia bilong Moem Bareks na wanpela sivilien hu­sat i bin stap long taim bilong trening.

“Olgeta soldia husat i go long dis­pela trening em 45. Ol i go long Ku­piano long 24 Jun na bai stap tripela wik olgeta long trening tasol hevi i kamap,” Mista Goina i tok.

Mista Goina i tok, taim bilong tren­ing ol i no save givim ol ‘live’ bul­let. Ol i save givim ol ‘blank’ bullet o bulet.

Em i tok, ol ‘live’ bullet em ol i save givim long ol Opisa ol i makim long karim long sait bilong sefti na sekyuriti sapos hevi bungim ol bai ol i yusim.

“Mipela i no save givim nating ol gan na bullet, mipela i save makim ol opisa long karim.

“Na i gat lo bilong bihainim long karim dispela kain ol samting long taim bilong trening na taim bilong go pait.

“Mipela bai lukluk gut long dispela na kamapim wanpela ripot long dis­pela hevi na tokaut bihain long 14 de bilong wok painimaut.

“Ol senia opisa bilong PNGDF i stap pinis long Kupiano na bai statim wokabaut bilong ol long hap we hevi i kamap i go long taim we ol soldia i go long trening long Kupiano.

Minista bilong Difens, Win Daki i givim wanpela oda long statim wan­pela inkwairi long painimaut long dispela trening na ol lain go pas long trening.

Mista Daki i laikim wanpela gutpe­la ripot i kam bek long dispela wok painimaut long wanem dispela hevi em namba wan taim long kamap long PNG Difens Fos.

PINIS.