Memba bilong Wau-Waria, Marsh Narawec i bilip aluviel gol main bai helpim ol manmeri moa long long bikpela gol main we i save helpim ikonomi tasol.

Memba bilong Wau Waria, Marsh Narewec na ol Opisa bilong Maining long Wau Waria distrik i sidaun na toktok long Aluviel Maining.

SAPOS yumi lukluk gut long main­ing sekta long PNG, bikpela gol main em bilong helpim ikonomi bilong kantri we ol liklik manmeri long ples i no inap gat mani long poket bilong ol.

Dispela toktok i kam long Mem­ba bilong nupela Wau-Waria distrik, Marsh Narewec na ol arapela Memba bilong Palamen husat i toktok long gutpela bilong Aluviel Main o Liklik Skel Maining.

Mista Narewec i tok, taim wok bi­long bikpela main i kamap ol pipel long ples we main i kamap i save lus long wok bilong main long wanem ol divelopa husat i go pas i save lus ting­ting long ol.

“Long dispela as gavman i mas senisim lo bilong Aluviel Main long wanem dispela liklik sekta bai holim PNG long bihain taim.

“Ol manmeri nau stap long Aluviel Main we ol i sidaun long sait long wara na skelim gol na go salim long lukautim famili bilong ol.

“Gavman i mas lukluk long seni­sim lo bilong Aluviel Main na givim long ol asples tasol,” Mista Narewec i tok.

Em i tok, sapos lo bilong Aluviel Main i senis bai yumi lukluk long mekim Wafi kamap las main long ol austait lain i kam wok long en na bai yumi lukluk long wok long ol arapela main bilong yumi.

“Mi laikim ol lain bilong mi mas wok na mas gat mani bilong ol yet.

“Sapos ol man i laik kam mekim bisnis long Wau, ol i mas kam tasol i mas givim wok long ol asplea lain.

Mista Narewec i tok, bai em i tok­tok wantaim Oro Gavana Garry Juffa husat i Siaman bilong Spesel Pala­menteri Komiti long putim wanpela Praivet Memba Bil long senisim lo bilong Aluviel Main na givim 100 pe­sen long ol asples lain.

Em i tok, dispela sekta i mas gat Ekt o lo bilong em yet we i ken lukluk long ol liklik skel maina na ol hevi bilong ol.

“Planti taim dispela ol lain save kisim taim long go long Mosbi long kisim ol laisens olsem na gutpela moa sapos ol i gat Ministri bilong ol yet long wanem taim ol i gat opis ol i ken lukluk long hevi bilong ol yet.

“Sapos Kopi i gat Ministri, Wel Pam i gat Ministri, Laipstok na Egri­kalsa, Aluviel Main tu i mas gat Min­istri bilong en,” Mista Narewec i tok.

Mista Narewec i tok, em i gat bilip long Aluviel Main long wanem olgeta lain long Wafi Golpu eria i save kisim mani bilong ol long hap na lukautim ol yet.

Em i tok, em i laikim gavman long luksave long Aluviel Main.

PINIS.